Zumhnak kan timi hi

Hebru 11:1
Zumhnak ngei kan ti hi… a taktak le a ngaingai a simi thil kan mit in kan hmuh khawhlo mi hi an um ko ti kan zumh hi a si.

Thlacamnak: ‘Ka Pa, na bia cu a nung I a tthawngmi a si caah nihin zong nangmah lila nih kan chim tthan ko tiah bawmhhal bu in le na kan bawmh ti zumhnak he Bawipa Jesuh min in thla kan cam. Amen!

Dawtmi Pathian fale hna, cantha a kan pe i kan nunnak a zuahrih tu Bawipa min thangthat si ko seh. Nizan zarh kha kan mino 40 renglo he Calvary Chin Baptist Church, Cincinnati khua kan va tlawng hna. Zankhat kan riak in zarhpi zan ah inn kan phan tthan. Bawipa nih a kan dawt i, kan tluang ngai, kan i lawm ngai te.
Nihin ah ruah tti ka duhmi cu ‘zumhnak’ kong a si.

Pathian fale hna, pumsa sining ah mit, hna, lei, hnar, le kut cu lenglei vawlei he a kan tonter tu, cu tonmi thil, kan nun ah a tthialtu, a luhpi tu an si. Kawl nih, ‘aa-yung-nga-pa’ tiah an timi khi a si i, mah hna lo incun lenglei vawlei he kan i pehtlai kho lo. An riantuanning ah hitin chim hnik u sih: mit cu hmuhmi vawlei a kan ukpiaktu, cu hmuhmi paohpaoh kan nun ah a tthialtu (transfer) a si. Tahchunhnak ah, thilraang cu mit nih ahmuh tik ah, lungthin le thluak ah a tthial colh caah, cu thilraang cu na zoh ti lo zong ah, khakha cu thilraang a si ti kha na chim khawh. Zeicahtiah cun kan mit nih araang timi kha kan thluak ah a tthial (transfer) cang caah ah a si. Cucaah mit nih hmuhmi vawlei paohpaoh kha kan thluak ah a tthial dih. Cubantuk in, hnar zong nih rim vialte, hna zong nih theihnak vialte, lei zong nih thawtnak, thawtlonak vialte kha thluak ah an tthial I, thluak nih an tthialmi paoh kha a cohlan lai maw, a silo ah a hlawnh lai maw, culawng cu a si.


Dawtmi Pathian fale hna, pumsalei ah thil panga nih an kan hruai bantuk in, thlarau lei zong ah a kan hruaitu a um i, cucu zumhnak kan timi a si. Thlaraulei ah kan mit cu zumhnak, kan hna cu zumhnak, kan hnar cu zumhnak, kan lei cu zumhnak, kan kut cu zumhnak hi a si. A sullam cu, thlaraulei thil paohpaoh cu zumhnak lawnglawng in hmuh khawh, teh khawh, tongh khawh, co khawh an si.
Chimduhnak cu, Pathian nih a timi thil paohpaoh kan nun ah a tak in a langh khawhnak hnga a tthialtu (transfer) cu zumhnak a si. Tahchunhnak ah, Pathian nih vawlei hi a dawt hringhran caah a Fapa ngeihchun a pek, cucaah a mah a zummi paoh cu an thi lai lo, zungzal nunnak an ngei lai (Johan 3:16) a timi cu zumhnak lawnglawng in na co khawh i, na tthial ve tik ah nangmah caah sullam ngeimi ah a cannak a si. Cucaah nangmah tein na hon chim tthan tik ahcun, hitin a si cang: ‘Pathian nih a ka dawttuk i Fapa Jesuh a ka pek. Ka van zumh cangka in ka thi tiloh, zungzal nunnak ka ngei cang’ tiah lunghmui ngaingai in na chim khawhnak, na au pi khawhnak a si cang. Cucu zumhnak rian a ttuanning cu a si.

Dawtmi hna, nihin ah Pathian he na pehtlaihnak cu zumhnak lawnglawng in a si. Cucaah hal kan duh ve: Na zumhnak nih an tthawn ter maw? A taktak le a ngaingai a simi thil, Pathian thil, pumsa mit nih hmuh khawh ttunglo mi kha, na nun ah an tthialpiak tu cu zumhnak a si khah. Rak I chek ve hnik.

Bawipa nih kan dihlak caah thluachuahnak kan pekpiak ko seh.
Sunparnak cu Bawipa nih co ko seh. Amen!


Bawipa rian ah,

Rev. Thawngling Mualhlun (Biakku pa)

Jesuh nih a hngalh ko

Hebru 4:15
Kan Tlangbawi ngan hi kan santlaih lo nak ah kan cung I zaangfahnak a ngei kho lomi tlangbawi a si lo. Kan Tlangbawingan hi kanmah bantuk tein tukforhnak a ing ve mi a si, sihmanhselaw sualnak zeihmanh a tuah lomi a si.

Thlacamnak: ‘Ka Pa, nihin ah na bia cu nangmah lila nih ttanhrih ko law, Fapa Jesuh hmang in na kan pekmi thil hi kan hngalh ter ko. Thlarau bawmhnak sawm bu in le na kan bawmh ti zumhnak he Bawipa Jesuh min in thla ka cam. Amen! ‘

Dawtmi Pathian fale hna, nihin zong Bawipa nih cantha a kan pek rih caah amin thangthat in um ko seh. Nan dam cio ko hna lo maw? Kan nih chungle Khrifabu zong kan dam lio te a si. Nihin ah ruahti kan duhmi cu Tlangbawi ngan Jesuh kong a si lai.

Dawtmi hna, voi tampi cu ka ruat tawn: Pathian nih hin kan tonmi thil hi a hngal taktak hnga maw, sifah te hna, retheih hnangcah te hna, mi nih huatmi si te hna, mi lak ah tlumtlak lo te hna, zawt le fah te hna vialte,,,,tbk..tbk… A cancan ah Pathian nih ka ton cuahmah mi hi a hngal taktak hnga maw? tihi kan i hal cio tawn. Keimah bantuk na si ahcun na hal ve men ko lai.
Pathian fale hna, kan Bawipa Jesuh hi harsatnak le pumsa lungthin tuarnak in a luat hleimi a si lo. A chuahnak chungkhar kha mi sifak ngaingai an si. Caw rawl kuang, a rim a va nam pahmi a si ko lai, ah pei a chuah kha. (Luka 2:7) Lehtama a ttuannak rian chung in thadit zangbatnak le pum fahnak a phunphun a tuar fawn ko lai.
Cu lawng a si loh, kha lio can i biaknak hruaitu hna nih pei awlawk an chawnh fawn kha. Nawl a ngeihnak pei an zuamcawh i, (Matthai 21:23) a cawnpiaknak zong an hneksak lengmang khah (Mt. 19:3) . Cun, hitin an ti rih: ‘..misaram le mizuram, ngunkhuai khawltu hna le misual hna hawikom…’
(Matthai 11:19), an ti pin ah, Pathian a thangchiat tiah an sawhchih (Marka 2:7)
Dawtmi hna, culawng a si rih loh. Amah hi khuavang nih a ukmi a si ko lai, khuachia ngeimi a si, a hrut cang, a bia ngai hlah u,’ (Johan 10:20) an ti. A sual lio ah an tlaihmi minu zong a hmai ah an rak rat pi i, an hneksak (Johan 8:2–11), lung zong in cheh an timh fawn (Johan 8:59, 10:31–39), cun miphun ningpi in a ping ah a kalpi hna, siangpahrang ka si, a ti tiah sual an puh fawn (Luka 23:2)
Pathian fale hna, na zumhnak ruang ah inn in thawldawi na tong bal maw? Kan Bawipa Jesuh nih a hngalh ko dah kaw, an khua in pei an rak dawi ve I khualeng lungpang ah thlak an timh kha (Luke 4:29). Hawikom ttha na timi nih an in hlaw bal maw? Kan Bawipa Jesuh zong a dawtmi nih hlawt le zamtak a rak tong ve ko dahkaw (Luka 22:54–62). Cu pin ah hawikom naihniam te nih pei a rawi cu. (Luka 22:47–48). Kan zawtnak le fahnak vialte zong a hngalh dih cikcek I pei, vailam cung ah a kan tuarpiak dih cu: ‘Asi nain zawtnak a inmi cu kanmah nih kan rak in hngami kha a si I, nganfahnak a tuarmi cu kanmah nih kan rak tuar hnga mi kha a si’ (Isaiah 53:4)
Dawtmi Pathian fale hna, kan Bawipa Jesuh hi kan mah bantuk tein tukforhnak a tuarmi, sualnak a ngei ttunglo mi a si. Kan tonmi thilkip le kan tuarmi vialte hi a hngalh dih ko. Cucaah kan mah zaka ah a tuarmi vialte hi a si. Cuticun kan nih cu cunglei ah hlawrh in kan nun khawhnak hnga caah a rat channak hi a si. A mak lawlaw ti law.
(ZBC #349 khi rak sa chih te)

Bawipa nih thluachuahnak kan pekpiak ko sehlaw, sunparnak cu Bawipa nih co ko seh. Amen.

Bawipa rian ah,

Rev. Thawngling Mualhlun