Zeithil poh a hmuh/theih/hman athiam mi

 

Pastor Cung Bik

Zeithil kong hmanhah lungre theiin um hlah u. Thla nan camnak ah Bawipa cu nan herh mi kha hal u law nan hal tikah lunglawm tein hal zungzal u. Cun Pathian dainak, minung hngalhak a lonhtu nih cun khrih zisuh chungah nan lungthin le nan ruahnak cu him tein a chiah lai (Filipi 4:6-7).

Kan bawipa zisuh nih a zultu pawl hna caah thla a cam piak tik ah, Vulei ta ka si lo bantuk hin anih zong vulei ta an si ve lo. An nih cu biatak khan thianter hna: biatak cu nangmah bia kha a si (Johan 17:16-17), ti ah a ti. Dawtmi hawi le hna ni fa tin te kan nunnak kan caan chungah hin mi zei ta dah kan si bik tawn, Zumtu hna hi kan bawipa zisuh khrih nih vulei ta si ding hi an kan duhpiak hrimhrim lo ti kha a lang. A mah Pathian bia khan thianter kha a kan duh. Vulei ah na ka thlah bantuk in kei mah zong nih  vawlei ah ka thlah ve hna V-18 ah kan hmuh, kei zong hi an mah ruangah ka thianh ve v-19, a ti.

Zumtu hawi le hna kan bawipa nih hi vulei ah a rian ṭuan ding in le khamh nak thawngṭha aupi ding in an kan thlah ve mi kan si. Cu chungahcun a mahbia in thianter kha an kan duh piak fawn. Vulei cung nuamhnak phun le nuam cennak hna ah kan nun kha hman ding a kan duh piak lo. Vulei ta ah canter an kan siang lo i a mah bawipa ta si ter tu kha a kan duh piak mi cu a si.

Hi vulei cung i kan nunnak ahhin lawmhnak, nuamhnak thawnnak , Fimnak le thil ti khawhnak hna hi A mah Bawipa sin lawnglawng in kan hmuh khawh mi le kan co khawh mi a si. Salm 19:1 ahcun Van nih khin Pathian sunparnak a langhter i a tuahmi thil kha a kan hmuh sak. Cun Jeim 1:17 ah Laksawng ṭha le laksawng tlamtling paohpaoh hi vancung in a rami an si; vancung i a ceumi thil a sertu Pathian sin in a ra mi an si. I Timote 6:17 Vulei cung thil i an rummi khan an i phorhlawt awk a si lo, cun bochan awk a tlak lo mi nan rumnak hi a bo zong nan i bo chan awk a si lo,..Sihmenhsehlaw kan ca i a ṭha ding zeizong vialte siang ngaiin a kan petu Pathian kha nan i  bochan awk a si..a ti.

Kan Bawipa zisuh khrih asining kan zoh tik ah  Kanan nupi thit nak puai ah zapi caah ti kha misur zu ah a chuahter ṭhan  john 2:1-2.  Cun Hngakchia zongkha thluachuak a pek hna Mtt. 19:13-15. Cun rawl tam in mizapi an um lio zongah changreu hlum nga  le nga pahnih a karhter i mithong nga renglo zong a pek hna i rel hlei hnih a hlei mi an char ṭhan Mtt.14:15-21. A mah zisuh khrih nih a chim rihmi cu Kei cu nunnak kha an ngeih i duhdimte i anngeih nakhnga caah ka ra John 10:10 a ti. Tuchun kan vulei kan nunnak ah hin thilsining a buaktlak tein a zohthiam mi si kan herh ko. Vulei thluachuah kan tin co mi hna hi Bawi sin lawng te in kan hmuh mi a si kha thei in kan nunak caan hman thiam in Bawipa sunpar nak a langhter tu fanu/fapa si kan hau. Veron Grounds nih cun Bawipa na keneh kan zulh khawh ve nak hnga ka bawm hram ko a ti.

Cun Hess nih Bawipa nih a asermi vulei a dawhnak le khuaruah har a si nak theikho ve ding in a thuahchuah a ka pek, A nain zungzal ka inn ka kal taktak tik ahcu vulei thilri hna cu ken khawh an site lai lo i an um te lai lo e.. a rak ti ve.

kan damnak le kan nunnak bawipa thluachuah hna cu hi zohthiam le a buaktlak tein nun pi thiam le a hman zia a thiam mi Bawipa rian ṭuan tu ṭha, nusal ṭha le pasal ṭha si i zuam cio hna usih.

Cung Bik

Philippines

Tho U Sih Law Sa Usih

Tho u si law sa u sih

By

Pastor Cung Bik

Nehemiah 2:18

Cun  Ka pa Pathain kut ka cung i ṭhatnak caah a ummi le siangpahrang nih ka sinah a chimmi bia hna kha annih cu ka chimh hna. Cun  annih nih an i thawh i, “Tho u si law sa u sih,” an ti. Cuticun rian ṭha ṭuan awk caah cun an kut cu an i ṭhawnter.

Biahram dawmhak

Bawikhrihah hawidawt  hna bawikhrih min in nan kut kan theih hna. Bawipa nih thluachuah van ni za he lam in hruai cio ko hna seh. Zahnak tlang mi hna nih Bawipa rian ṭuan ding ah kan i timhlam cuahmah lio ah  “Tho u si law sa u sih,” mah bible cang te hin thazang la hna usih ti ah kan sawm duh ve hna.

Nehemiah cauk hi  ṭhen ṭhum ah  ṭhen khawh a si. 

1.      Nehemiah nih a hruai hna i Jerusalem khua kulhnak kha an remh ( Neh. 1-7).

2.      Ezra nih Khan Pathia Nawlbia kha mizapi cu an relpiak hna i an sualnak kha an i phuang i an i ngaihchih, Biakamnak kha an tharchuah  (8-10)

3.      Nehemiah hi Pathia a bochan mi, Pathian sin ah thla a cam zungzal mi a si nak le a rian tuannak dangdang hna  (11-13) ah hmuh  khawh an si.

Tu tan i van chim ka duhmi cu Nehemiah hruainak in Jerusalem kulhnak vampang a rawk mi kha Lungrual taktak in, an mah le an zawnka cio khan ṭuanvo an i lak i an remhnak kong hi a si.

1.      Nehemaih cu Susa khua chung a um lio ah Hanani nih  Judahmi  saltannak chung in a luatmi hna  harnak an ton nak le Jerusamlem kulhnak vampang a chimh nak kong kha a chimh. Cu bia a theih tik ah cun Nehemiah cu a a ṭap i saupi a ngeih a chia, Cun Pathian hmai ah khan rawl ul in thla acam lengmang ti kha kan hmuh.

Dawtmi hawidawt hna Kan Khua ram le Kan tlang kong thawngpang kan theih tikah hin zei bantuk in dah na thinlung ah na tur ve ning ( Felling – Khansa) ve ning a si ti kha kan bia hal nak si ve seh ti ka duh. Mi hmai khap lo in saupi a um ve cang mi kan tlang te hi…  Zahnak tlang hi kan pa le mi tampi hna nih harsat nak tam pi an tuar,  rian an ṭuan, Ka pa le hna rianṭuan nak thawngin kan hmai arak hngal ngai, Biaknak lei in siseh Fimnak lei insiseh  Zahnaktlang ti mi kan rak si ve. Asinain mah an kutneh zung dawh, mi tlangdang hmai i kamlochun cha bang an rak dir  cia mi tampi cu arawk cuahmah cang, cu tikah Chanthar mino hna nih kan pa le kutneh dawh a rawk mi remh ṭhan ding ah rian lian ngan kan ngei cio ve.  Tlang le ram ṭhanchoter nak ding ah Bawipa sin ah rawl zong ulh in thlacam hi kan herh mi a si ve ko rua. Cucu mah kan bible hmangin kan sawm ve hna.

2.      Nehemiah cu apupa hna  thlan umnak Jerusalem ah cun a va kal i kulhnak vampang remhnak dingah cun mipi sin ah a va kal, A zeibantuk harnak in dah kan um i, mi mitkem in kan um, zeitin dah thilsining cu a si ti kha nan hngalh. Kan nih nih ningzah hmaichiat kan  inti nak hnga lo, ra ulaw Jerusalem kulhnak vamping cu remhhna usih a ti hna. Cutik ah cun zapi nih cun an i thawh i, “Tho u sih law sa u sih” an ti. Cuticun rian ṭha ṭuan awk caah cun an kut cu an i ṭhawnter. Cubantuk in kan nih zawng  kan peng tlang a rawk mi remh/ ṭhancho ternak ding ah chimrel tu le lam hrihhruai tu um cu kan herh ngai ve. Hrihhawh tu hna nih bawipa sin thlacam nak le thinlungtak te in kan kal ahcun mipi nih cun Lungtho lo incun an um lai lo i, Kan kut cu rianṭha ṭuan ternak dingcaah cun kan sam khawh cio ko lai. Mipi zong nih hruaitu hna bia kha lungtho tak te in kan zumh /zulh ve hna ahcun Kan Zahnak tlang mimit kem in a um mi le zeirel lo mi tlang cu fawi te in kan remh khawh kolai,, kan zapi tein Lungtho thanuam tak in kan kutṭhawn ter hna usih.

3.      Remh awk ah khan rian an i phawzam cio. Neh. 3ff ahcun anmah le zawnka cio in a rawkmi cu an rak remh cio caan rau lo te ah Jerusalem kulhnak  pi cu dawhtaktak in an sak ṭhan colh ko ti kha a lang.  An zawnka cio te in ṭan an lak bantuk hin kan nih Zahnaktlang hmunkip le khuakip um mi hna cio zong nih ka tikhawhnak zawn cio in teirial cio kan herh. Inn tungkar khat/Innka pakhat karlak cio te khan (khuakhat nih) vampangcu  ṭuanvo van i lak cio hna usih law, fawite in kan sakkhawh ve ko hnga mu…

Biatlang komnak

Bawikhrihah dawtmi ulenau hna Pasal/nusal ṭha hna  nunning ah biatak chuah duhnak thinlung a ngei zungzal, lungdongh nak an i teiter bal fawn lo. Cubantuk tein kan nih zahnaktlang zong Pasal/nusal ṭha si kho ve ding in Bawipa rian ṭuan ṭi nak ah le kan tlang bawipa tlangtluan a si khawhnak dingah tei ma cio hna usih law, Kan zahnaktlag cu Bawipa ram/bawipa lennak, bawipa bia karhchonak le khualtlung mi leng hna nun nuamtein a umter kho tu tlang si nak dingah canter zuam hna usih. Kan Pa Rev. Van Lo Hall min kan bunh mi zong hi Bawipa Ram caah a si ti thinlung in thok  mi,  a si zong kha thei buin kan rian hma tangmi cu Nehemiah le a mipi hna nih Lungthin fak in , an temtuar nak kha ruah in tei an van rial tik ah mipi cu an tho i an  kuat cu Innsaknak ah an ṭhawnter bantuk in kan nih zong Kan tlang le rem sersiam in, kum 12 chung mitlangdang hmai khap lo le ningzak felfualpi kan um nak le mimit kan kem ko hi kan ti tawnmi Kan Pa Rev. Van Lo Hall pi cu Tho u sih law sa hna usih.

Kan chimnak ah duh amtuk in kan chim sualnak a um mi cu Pathian le carel tu nih ka ngai thiam uh law, kan zapi caah santlai mi bia ah bawipa nih thluachuah kan pekpiak ko seh! Amen…

Cung Bik (Ruabuk)

Manila,

Philippines

Ph.0063-926-682-6186

Khrihfa timi cu Khrih caah nun hi a si

Pastor Cung Bik

Galati 2:20,Filipi 1;21, Rom 6:4, John17:15, John17:18

Filipi 1;21 Nunnak hi ka caah zeidah a si? Kei ka caah cun nunnak cu Khrih a si ko.

Dawtmi zumtu unau, khrihah pumkhat a si mi nan zapiten an kut kan tlaih hna, thawngṭhabia i hrawmṭidingah ka duhmi cu khrihfa nun cu Pathian ram caah nunnak pek in ṭuan hi a si ko. Mission rianṭuan hi a si kan ti lai cu, mah he pehtlai in chim ka duh. Zumtu hna kan nunnak hram cu Khrihcaah nun i pek hi a si. Cucu kan bible chungah hmuntampi ah hmuh khawh a si.

Zumtu hna kan nunnak/kan thawnnak cu Khrih a si.

1. Galati 2: 20 cucaah a nungmi cu keimah kha ka si ti lo, ka chung i a ummi Khrih tu hi a si deuh. Atu i ka nunmi nunning hi, a ka daw i ka ca i a nunnak a pemi Pathian Fapa zumhnak thawngin ka nung. Paul nih Galati khuami hna sinah ca a kuatmi hna kan zoh tik ah tu i a nungmi hi ka chungah a um mi khrih a si a ti. Dawtmi unau caan tampi ah khrihfa ka si kan ti, thlarau in ka khat kan ti, zumhnak nung ka ngei, Ka piangthar, kan ti, sihmenhsehlaw caantampi ahcun cu kan zumhnak/khrihfa ka si kan ti nak hna cu a lo i kan ralpa sehtan nun in kan nun caan a tam theo, Zumtu khirhfa ṭha taktak a si mi nih cun nifatin kan nunnakchung ah Khrih kha kan nunter deuhawk a si ti kha kan bible nih a kan cawnpiak mi cu a si. Na nunnak i lam an hruaitu/ nunnakṭhawnnak an petu kha mizei dah a si ve? Pawl nih cun tu i a nungmi cu keimah si lo in ka chungah um mi khrih tu kha a si deuh a ti. Kan chungah nunnak/thawnnak a kan petu hi khrih a si ve cio hnga maw?

2. Filipi 1;21 Nunnak hi ka caah zeidah a si? Kei ka caah cun nunnak cu Khrih a si ko. Pawl i a nunnak ahcun kei ka nunnak hi cu Khrih a si ko a ti ṭhiamṭhiam. Cucu zeitin dah a si khawh ti ahcun khrih cu khamhtu le bawipa ah a co mi hna khrih an zumhnak ruangah tipil a ingmi hna i an tuahmi khan a hungfiang chinchin lai ka zumh. Cucu Rom 6:4 Cucaah tichung i tipilnak kan vung in ah khan amah he vui ṭi kan si i a thihnak ah khan kan thi ve; cu bantuk ṭhiamṭhiam in Khrih cu Pa sunparnak ṭhawnnak nih a thawhter bangkhan kannih zong nunnak thar ah kan nung ve lai. Dawtmi pathian fa le hna khrih thihnak le thawhṭhan nak a zum mi kan nih zong nih teh cucu kan cohlan kho taktak ve maw? Cu khrih a zumtaktak mi hna nih kan nun dingmi cu a mah khrih caah nunnak pek in nun kha a si ko. Ka piangthar ko e kan ti taktak ahcun Khrihcaah nunnak pek in a rianṭuan hna usih. Khrih he nan um ahcun ṭhawnnak na ngei lai i na tuahduhmi kha na tlantling fawn lai.Khrih he nun ṭi a biapituk hi mu …cucaah Khrih nih a kan cahmi bia cu a thawngṭha au pi le a zum lo tu hna sinah khamhnak thawngṭha va aupi i zumtu ah va serding kha an kan cawnpiak i an kan fial mi rian zong a si cucu Mtt 28:17-19 ah fiangte in kan hmuh.John17:15 Vawlei cung hin la hna tiah kan nawl a si lo, sihmanhsehlaw Mi Ṭhalopa sin khan him tein chia ko hna ti kha kan nawl, a ti Dawtmi Pathian fa le hna fakpi in ruah hna usih law ti ka duh mi cu Kan mahbantuk a si ve mi minunghawi Bawipa dawtnak thei lo mi hna mitampi an um rih, sualnak hmun ah a ciahmi unau an um, phundang i chimahcun khrih nih a ka dawt i a kan khamhnak thawngṭha a thei lo le a cohlang kho lo mi hna tampi an um kha philh hlah! Mah hna caah khan khrihnih rian ṭuan dingah an fian mi na si zongkha thei pengfawn law .. Na dawtmi na minung hawi a zum kho ve rih lo mi hna caah Na thlacamnak le na chawnva, na caan pe zungzal rih ko. CuCu khrihfa i a nunnak cu a si. Kan Chungah a nungmi khrihnih an fial mi rian lianngan bik cu a si. Keimah na ka thlahban tuk in vulei um mi kha kei zong nih rian ka pek ve hna, mah na thawngṭha chim dingah ka fial ve hna a ti.John17:18 Vawlei ah na ka thlah bantukin kei zong nih vawlei ah ka thlah ve hna. Nang mah le kei mah kha vulei i thlah ve mi hna cu kan si. John 17:4 Vawlei cungah na sunparnak cu ka langhter cang; na ka fialmi rian cu ka lim cang. tiah John nih a ti bantuk in khrih a zumtu mi hna nangmah le kei mahnih kan ti kho ve hnga maw?

Biadonghnak

Dawtmi khrihah unau Pathianfa le hna i nun nak a si dingmi cu khrih he nun ṭi , Khrih cu kan ṭhawnnak thazang ah ser khawh i, Cu kan ṭhawnnak thazang vialte cun Bawikhrih ram kauh nak ding caah rian lianngan kan ngei cucu kan nunchung i kan lim khawh ve dingah i zuam hna usih law ti ka duh. Khrihfa na si ahcun Khrih caah nunnak pe, Na chawva le na caan pek a herh, Nangmah pumpak zong in ṭuan. Khrihfa si mi kan nunnak cu Khrih ramkau ter, sehtanram bitter kha a si. Mission na ṭuan awk hrimhrim kha a si.

Kanzapi caah Bawipa nih a thar in thluachuah kan pekpiak ko she!

Cung Bik ( Thawng Thawng pa)

Philippine

Bawipa nih a kan fialmi rian

Pastor Cung Bik

Bawipa nih a kan fial mi rian

Luka 6:46 “ zeicahdah nannih nih, 'Bawipa, Bawpa' nan ka ti len ko i ka chimmi hna cu nan tuah ttung lo?.

Khrihah hawidawt hna Kan Biakmi Pathian nih zei rian dah a kan fiangti he peh tlai in kan baibal chimmi te kha tlawmpal in chim ka duh.

Bawipa dawtnak thawng le zumtu hawi hna nan thlacampi nak thawngin Missiology he pehtlai in ka cawn cuahmah lio te a si ve. Kan cawnmi Subject poh ah Mision he ai pehtlai mi deuh lawngte kha cawn a si. Tu lio i ka cawmmi subject ah a tel ve mi pakhat te cu Indigenous Mission ti mi a si. A tawinak in chim ahcun chuah kehnak a ngei holh le nunphungte zong a ngei i khua te um mi pawl a thangcho lo ngai pawl, an mah nunphung le biaknak an ngei mi te a dirpi kho ngai mi sinah mission tuan nak kong he peh tlai deuh kha a si ko rua ka ti.

Voikhat cu kan sayamah/Professor nu nih khan mah indigenous pawl an um nak hmun cu Hika Philippine ah a um cu ka cun kan kal hna lai i an sining tete le an dir hmun tete nan hal hna lai i paper nan van tuah lai I zeitin dah mah hna sin ah Pathian thawngtha bia kan luhpi khawh lai i mission kan tuah khawh ning a si lai a lam nan kawl cio lai ti a si. Kan Class dihlak in kan kal tti hna kan Professor nu zongnih an kan zulh ve, cun mah ka hmun ah Missionary an chiah mi zong nih an kan zulh I kan kal hna. Kei ka ruah ningah cun Ram dang a si le cu ti ngaingai in cun a thacholotuk mi cu an si lem lai lo ti kha ka ruah cia hmuh ve pal lo ah cun ka mawh ve ruam lo an khua lipi chung Manila an ti lawngah cun ka um i, a ropui nak hmuh ahcun um cu si kaw..

Cuka hmun hma lei kal dingah kan I thawh, Khua te zong kan phanhnak tete a um pah i Electric le Motor lam cu a phan dih ngawt ko. Mah phun ahcun ka ruah i ka thawh ve phot ko.

Voikhat nak ka chuah sual, Febuary 02/2012 zing suimilam 6am in kan i thawh. Khua te i lehlazi/tlawn ahcun ti ah Computer chiate le Cell phone te cu ka ken ve phot. Kan chawi i Bus voihnih kan I thleng mah hnu ah Jepney voi hnih kan i thlengtthan cu hna lawngah chuncaw ei nak ding hmun kan phan I chuncaw kan chuang I kan ei. Mah ka cun ke in kan kal cang lai an ti i ka arko ka thil kha a rit ngai ngai chiah ta ding lawng kha ka tuah Computer le thil cheukhat cu ka chiah ta. 2pm in kan i thawh i Vok kal nak lam bantuk/ Ruabuk le Thau kan i tlawn nak bantuk lam bi taktak mi in kan chawi, Kan Mei holh in phaisa tamdeuh a la mi an si, Mei hol zuar pawl cu kan ton hna, kan chanwh hna ah khin mitihzah an thiam ngai i mi a kan ngamh lo ngaingai zangfak te in an um. An tha a thawng an phurhmi Meihol hi kan cawi kho lo ti tluk te a si. Zanlei 6pm ah an um nak khua te cu kan phan a muih hnu ah kan mah te in rawl kan van i chuan, an kan zoh ngam lo ngai. Kan mah cawl te in cun kan cawl ve ko. Ka thinlungah a hung chuak mi cu Kan Siang Bawi Carson le Laura hna kha ka mit thlam an cuang i Laura i mah mi hna sinah cun khua kan sa kho lai lo a ti i a mit thli a luang an ti mi hna kha a si awk a si ko a mawh bak lo ka van ti ve. Zan ahcun khua a mui Mei le um lo thing tih ding le rawl chuan nak khim te lawng cu si, Mui lak ah kan thu Datmei kan i ken i lengchuah can tete ah kan i chuahpi zan ih a hungza thli a hrang ngai hawi i ihnak thathi le um lo cu a si. Hngilh lo ti awk in kan um zan khua dei ve ko. A luan cia mi kum zakhat lio ah lai mi kan sining mit thlam ah ka cuan ter ah Siangbawi te rian ttuan nak a thar in ka van hlam i upat ka pek chinchin hna. A fawi tung lai lo ee ka ti ve. Rawl kan chuan zawkzawk i, Inn dang ah kan leng tthan hna lai i Interview nan tuah hna lai ti a si.Kan van i tim Pastor thuan phun te cun ka van i thuam tthan i kan chawi tthan Kan sayamah nu nih khan na thil hi na thlen ah tha lai a ka ti thlen hau lai lo inn lak i vah ah cun a tha ko ka ti a voihnihnak ka chuah sual tthan, Kan chawi cu inn lak um mi an si ti lo ai Ram tang i a um mi pawl inn remh rai ngei lo mi pawl sin kan va phan ko. Ti va kam ah khua an sa deuh hna i tiva cu a sum lei ah kan hrawn thluah mah I an um ve thluah mahko a hnu ah cun ka keden a rit cang ka ke fak i ke den lo in ka kal , ka za a hung no ve hawi ai, Ka thin lungah chuak tthan mi cu kei mah te hmenh mah tluk I ka ke za no I kal ka harh ah cun mu Kawl Ram I Misionary phan hmasa cem Adoniram Johson Kawl nilin setpho I keden lo I a kal ve peng mi kha ka thin lung a chuak tthan. Missionary kal hi a fawi tung lai lo ti ah ka ruat. Mipi pawl cu bia kan ruah hna zei hal hmenh ah an theih khawh mi a um lo. An chuak kum zong thei hlah an fa le chuahkum zong thei hlah Tipil nan ing cang maw kan ti hna ing an ti a ho nih dah an in ter kan ti a min zong thei lo an in can zong an thei hawi lo. An ei ding mi ka zoh ah ei har ngai ding a sib uh lawng bak an thua ko. Ti hang zong so um lo. An Inn lo zoh ah Lai lei vok in bak te he ai tluk ko. A poi ko aww… ka ti Bawipa nih a sermi hna minung an si ve ko ttungah cun ti kha tampi a ka ruah ter than.

Ka hawipa nih mah ban tuk in a um mi kawl ram zongah an um ko rih dahkaw an tam ve ko na in an inn lo ahcun mah nak in a tha deuh ko a van ka tit than ve hoi. A ce rian ttuan ding pei tam tuk kan ngeih ne hi ti ah ka van ruan than. Ziah Zumtu kan si kan I ting tung zum lo tu sifak santlai lo mi le hawi theih a thei kho lo mi hna sin ah mission kan tuan ve ne lo. A ttuan mi kan tlawm tuk tung ti ah ka ruat than. Kan baibal thim mi Luka 6:46 “ zeicahdah nannih nih, 'Bawipa, Bawpa' nan ka ti len ko i ka chimmi hna cu nan tuah ttung lo?. Ti mi kha ka van rel ah ka thin lung ai phun dang ngai tthan. Bawipa nih tuah uh a ti mi cu zei dah a si ne hnga ka ti Matthai 28:19 Cucaah khuazakip ah va kal uh law miphun vial te kha a ka zultu ah va ser hna u: Pa le Fa le thiangthlarau min in tu pil nak va pe hna u law,….. a ti. Ramkip le khuaza ah thawngtha bia phun i a zum lo mi hna sinah zumhnak nung an ngeih khawhnak kan rian a si. Zumtu cia sin lawngah um/azum cia mi thenthek a can a si ti lo. Zumlo tu hna sinah kal I rian biatak te in ttuan can a si ko cang. Bawipa dawtmi Pathianfanu/fapa hna rian a kan fialmi kha zoh in zumhnak he kal a herh. Cun Rome 10:14 Asinain an zumh lo ahcun zeitin dah a min cu an auh khawh lai? Cun bia kha an theih lo ahcunzeitindah an zumh khawh lai?Cun bia cu chimh an si lo cun zeitindah an theih khawh lai?.... A chim tu kha um an hau I a chim mi kha thlacamnak le chawva in bawmh le ttan pi zong kha rian a raksi ve.

Dawtmi Pathan dawtmi fa le hna Bawipa nih a kan fian nak rian ah hin na ti khawh chung, nangmah nap um akal khawh lo zongah na chawva, na thlacamnak..ete…. a phunkip in bawipa nih a kan herh ko ti thei in Bawipa fian mi rian Mission rian/ zumlo hna, sifaksantlai lo zei thei kho lo mi hna fim chimh tu le lam hruaitu ding kan si, cucu Khrihfa hawidawt hna Bawipa fialmi rian taktak cu a si ko. Kan baibal rel mi nih a kan sawm mi cu a si ko.

Bawipa nih kan zapi caah a thabik in thluachuah kan pekpiak ko seh! Amen…

Cung Bik ( Biak UK Thawngpa)

Manila

Philippine