Jesuh Cu A Tthangcho Lai

Baibal caang: Anih cu a tthangcho lai, kei cu ka ttumchuk lai, a ti. Johan 3:30



Tipil petu Johan hi mi ralttha, Pathian nih a thlarau in a thuamhmi pa a si. Aho mithmai hmanh a zoh lomi pa a si. A sining le a rian aa thei zungzalmi pa a si. Mi nih an cawisan len lio ah amah le amah a ti sang hlei lomi pa a si. Voi khat te cu Jesuh Khrih kong ahhin lung rethei deuh in a um i a zultu kha Jesuh sin ah a thlah hna i bia a hal ter hna. "A ra lai tiah timi cu na si maw, asiloah a dang dah kan orh rih lai," tiah Jesuh cu bia a va hal... Jesuh nih Johan zultu pawl cu a leh hna i, "Va kir u law nan hmuhmi le nan theihmi: mitcaw nih khua an hmuhnak le, kebei nih an kal khawhnak le thinghmuimi nih thiannak ah hmuhnak le hnachet nih khua an theihnak le a thimi hna nunter tthan an sinak le sifakmi hna sinah Thawngtha chim a sinak kong kha Johan cu va chim u. Keimah kong ah lung awttawm in a um lomi cu an caah lunglawmh awk a va si dah," tiah a ti (Luka 7: 20, 22). Johan hi lung awttawmnak a ngei ko nain felte in Jesuh a fuh bak i bia a haltu pa kha a si. Thonginn chung i thih a bawh lio caan ah a siaherhmi kha ralttha tein a hal tertu pa kha a si.

Johan Thawngttha chungah tipil petu Johan lungput fiang ngaingai in kan hmuh. Bawi Jesuh kong ah a chim ngam bakmi cu: Anih cu a tthangcho lai, kei cu ka ttumchuk lai ti hi a si. Hrilhfiah nih a kan chimhning ahcun hi bia a phuan hi a ruang pathum in a langhter: (a) Bawi Jesuh Pathian a sinak (caang 31); (b) Pathian bia a chim i a cawnpiak hna caah (caang 32-34); le (c) Nawlngeihnak vialte kha Amah cu pek a si caah (caang 35-36) an si (CBC, 742). Tangtthumh nun le toidornak nun ahhin i chuah sualnak a um kho lo. Hmunsang in tanglei ah tlaknak ding hmun a um ti lo. Ttuang ah aa phahciami nun a si caah a si. Cu bantuk toidornak lungput he Pathian fuhpanh kha raithawinak taktak a si zia Baibal nih a kan cawnpiak. "Ka raithawinak cu toidornak lungthin hi a si, maw Pathian, toidornak lungthin le nawl ngaimi lungthin hi na hlaw lai lo." (Salm 51:17; cf. I Sam. 15:22-23).

Tipil petu Johan nih hi biaroling a chimmi hi Bawi Jesuh zong nih a nunnak ah a hman bakmi a si tthiamtthiam ve ko. Paul nih a uar tuk caah zeitindah a hun ttial ti ahcun: "Mi toi ah aa dor i nawlngaihnak lam kha thih tiangin a zulh- vailam cung thihnak kha," tiah a phuan (Filipi 2:8). Pathian duhnak zulh le tuah kha a duhnak nganbik ah a chiah zungzal caah hihi a tuah khawhmi a si. Kannih cu rian khinh kan si tik ah nawlngaihnak (obedience) lam zulhnak nakin nawlngeihnak (authority) lam tu kha kan zulh sual tawn. Nawl ngaimi si lo in nawl ngeimi kan hun si ciammam tawn i khrihfa zumhnakpi hoi hna hi a mui kan chiat ter tawn. Biaknak lei i hranhram in i uknak (religious dictatorship) nih mi tampi cu kan nun a den peng ko. Hi tukforhnak chung in zapi zate cu kan i hlitphuak kho tawn lo. Asinain tipil petu Johan le Bawi Jesuh nih cun an nunnak in an rak langhter khawhmi nunziamawi a si. "Kei cu ka zor lai i, Bawipa cu ka nun ah lian ngan ko seh," ti kha kan thlacamnak si ve hram ko seh.

Rev. Lal Pek Lian