Ti in Mitsur zu ah

Thlennak: Ti in Mitsur zu ah

Jesuh nih sinum pawl cu a thawh hna i, “Hi ralca ahhin ti rawn hna u,” tiah a ti. Liam thluahmah in an rawn hna i annih cu, “Ti kha tlawmpal in hei than u law rawldanghnak tlangtlatu kha hei pe u,” tiah a ti hna. An hei pek i, mitsur zu ah aa cangmi ti cu a rak teh. Hi mitsur zu hi khuazei in dah a chuah ti kha a hngal lo. Johan 2:7-9

Judahmi nupi tthit rawldanghnak puai hi zarh khat chung hoi hna tuah a si tawn. Hi tluk in a biapi mi puai ah mitsur zu a dih timi cu mopa le monu caah ningzah awk ngaimi khi a si hnga. Jesuh le a zultu nih Cana khua i nupi tthitnak puai an zawh ve hi Jesuh a nu Mary ruang ah sawm an si ve caah hin si dawh bik a si (Nelson’s Compact Bible Commentary). Tuanbia an chimmi ahcun Johan nupi tthit puai a si an ti. Hi ti in tuanbia a umnak zong hi Mary tavuan a hun ngeihmi a lawh ngai ruang ahhin a si an ti. Mary nih Jesuh rian a fial tik ah khan ‘ka can a cu rih lo’ a ti tik ahhin Messiah a si langhter a hun cu deuh lo ti zong a si kho i, vailam i an thah can zong khi a chim duhmi a si kho men tiah ruahnak a um. Bawi Jesuh nih kutke ttawlnak ca i chiahmi ralca ah khan ti kha liam thluahmah in a rawn ter hna i ti cu mitsur zu ah a thlen piak hna. A phi chuak cu lawmhnak in a khatmi nupi tthitnak puai a si. Bawi Jesuh nih khuaruahhar thil a ser tik ah Johan catialtu nih a lungchung in thukpi in aa chiahmi cu Messiah hmelchunhnak a si ti hi a si. Hi nih hin a langhtermi cu Jesuh sunparnak le Pathian Fapa a sinak kha a si (caang 11 le 12).

“Mitsur zu kha khuazei in dah a chuah ti kha a hngal lo,’ timi zawn te ahhin kan hun i lak ve awk ah a herhmi cu: Bawi Jesuh nih cucu khakha tuah u tiah a kan fial tik ah kan theih setsai lo zong ah a bia kan ngaih ahcun khuaruahhar thil hi a hung chuak kho ko ti hi a si. Kan hngalh lo zong ah Amah chimmi bia kan zumh le kan tuah ding kha a biapi ngaingaimi a si. Ti le mitsurzu sining in thlennak kong kan hmuhmi ahhin chunglei thlennak taktak a chuahpi tu a si. Ningzah mualphonak chung in luatnak hmuh a si pin ah lawmhnak le thangtthat conak a si. Cu nih tehte a hei khaanmi cu Jesuh cu Messiah a si hmelchunhnak a langhtermi kha a si.