Biakinn Ah Jesuh An Chuahpi

Phung Tlinternak: Biakinn Ah Jesuh An Chuahpi

Baibal caang thim: “Bawipa nawlbia chungah cun, nan fater, pa a si mi hna paoh kha Bawipa sinah nan pekchanh hna lai, tiah aa tial. Cun Bawipa nawlbia nih, Thuro tuah khat, asiloah, Laileng no pahnih, raithawinak ah nan pekchanh hna lai, a ti bantukin annih nih raithawinak kha an pekchanh.” Luka 2:23-24

Luka catialtu nih hin Biakam Hlun i biaknak phung kha biapi ngai in a hun langhter. Moses sin in nawlbia a rak pekmi hna kha naute Jesuh a nu le a pa zong nih an rak tlinter ve (cf. Lev. 12:6-8).[1] Thuro tuahkhat a siloah laileng no tuah khat hi a man a niam bikmi raithawinak sa an si. Kan caah thil pakhat a hung fiangmi cu Jesuh a chuahnak innchungkhar hi a sawsawh te, nuamh saihnak timi a umlonak innchung khar, phaisa semrel te in hmannak innchung khar, a chung i a ummi hna nih nuncan a harning fiangte in an hngalhnak chungkhar, a si kha a si. Cun raithawinak satil nakin a biapi deuh tiah Luka nih a hun langhter duhmi cu Bawi Jesuh kha biakinn ah an chuahpi[2] ti hi a si. Biakinn ah Simeon an timi pa Pathian mipa nih Messiah a rak hngahnak kha kan hmuh khawh.

Luka nih hin kan chim lengmang bang khan Thiang Thlarau riantuannak hi biapi ngaiin a hun langhter. Simeon cu Thiang Thlarau nih a umpi mipa a si a ti pin ah Thlarau nih a hruai a ti (Luka 2:25 -26). Naute Jesuh a hmuh bak in a rak pom i Thlarau nih lam a hruainak thawng i Pathian sin ah lawmhnak bia a rak chim i Mary zong kha biathli a chimh.

‘Fa le hna hi Pathian sinin kan hmuhmi ronung an si. Pathian thluachuah an si,’ tiah Salm catialtu nih a kan chimh (cf. Salm 127:3). Lamkaltu hna chan a hun dih i khrihfabu a dirnak zabu pakhatnak in pathumnak tiang karlak ahhin khrihfabu nih fakpi in an rak i cawnpiakmi cu ngakchia biakinn i chuahpi i thlacam piaknak hi a si. Nu le pa bak nih chiatserh in biakamnak Pathian le mi zapi hmaiah an rak tuah tiah James D. Smart nih a kan chimh. Fa le kha Pathian zumhnak ah ningcang tein an than khawh naklai kan mah nu le pa nih tuanvo nganpi kan ngei i khrihfa zumhnak kan cawnpiak hrimhrim hna lai ti in bia cu rak i kam a si.[3]

Biakinn ah kan fale kan phanh pi hna maw? Jesuh kehram ah kan rak phanhpi kho hna maw? Hi biahalnak hna hi fakpi in kan ruah awk le kan tuan awk a si ve mi kan rian a si. Naute Jesuh kha Biakinn an rak phanh pi. Cu nih cun Thiang Thlarau nih a rak um pi mi pa Simeon lawmhnak le thlacamnak a kan theihter (Luka 2:29 -32). Hmailei i naute nih a tonte dingmi cung i a nu Mary a lungthin a kuaihmal dihte ding tiang a rak chimh chung hna (Luka 2:35 ). Simeon thawng in Messiah kamh a rak sinak le mithmuh kuttongh in a hun tlinnak kha Luka nih a hun char i duhnung ngai in a hun kan chimh khawh. Hi tiang zong ahhin Luka nih suihri le ngunhri bang Jesuh tuanbia a zam tikah Thiang Thlarau riantuannak kha hmunlai ngai ah a chiah i a nolh lengmang ko.


--------------------------------------------------------------------------------

[1]Thuro tuahkhat a siloah laileng no tuah khat timi nih a hei langhtermi cu Josef le Mary hi sifak an si ti kha a si. David Van Bik tialmi Luka Thawngtha Fianternak: Uk Khatnak ah felte in rel chap khawh a si.

[2]Baptist tradition zong hi kan zulh deuh ah a tha ngai ti in ka ruat tawn. Biakinn i kan fale thlacam piak hi a biapi taktak mi a si. Atu chan ahcun pastorte le khrihfa upa hna zeimaw zat sawm in thlacamnak inn ah tuah piak a si deuh. Thlacam ciocio cu a tha dih ko lai. Asinain biakinn i kan fale chuahpi hi Baptist rophun pakhat a si i felfai deuh in tuah than khawh i zuam awk a si tiah ka ruah.

[3]James D. Smart, The Teaching Ministry of the Church ( Philadelphia : The Westminster Press), 180. Ngakchia tipil peknak kong hmanhah Smart nih hin nu le pa nih khrihfabu le Pathian hmai i an biakam langhternak hmelchunhnak a si a ti. Khrihfa hmasa hna kha sual ci ruang i an buai ruang ah ngakchia tipil peknak hi a si ti in an buainak a um lo.



Siaherhnak he,

Lal Pek Lian