Ngakchiapa Jesuh

Baibal caang thim: “Ngakchia cu a hung thang i a hung thawng; fimnak in a khat i Pathian thluachuahnak kha a cungah a um.” Luka 2:40

Luka thawngtha cauk lawnglawng nih ngakchiapa Jesuh sining zeimawzat a kan chimh. Biakinn ah rai an thawi piaknak siseh, a thanning kong siseh, kum hlei hnih a tlin i Lanhtak puai zawh ah Jerusalem Biakinn i an kalpinak kong kha kan hmuh khawh. Hi kong vialte hi a nu nih felte in aa cinken mi a sinak kha Luka nih a kan chimh (Luka 2:51 ). Tuanbia bantukin an chim tawnmi ahhin ngakchiapa Jesuh hi Nazareth khua i a thannak ahhin zanlei fatin ti awk in lam a leng ve tawn rua. Fing le tlang lak ahhin Pathian sermi thil anmah le an sining cio (nature) kha a lawmh pi tawn an ti. Salm 121 (Tlang khi ka hei cuan hna i … Israel hupphengtu cu a ngu bal lo) hoi hna khi a sak duh ngaimi a hla meilah a si an ti.

Nazareth khua ahhin a nu le a pa cawnpiaknak tangah felte in a rak thang. Judahmi phung ahhin pa ngakchia kum 12 asiloah kum 13 a simi cu Nawlbia Fapa tiah auh an si cang i nawlbia, nunphung, le pawcawm kawlhawlnak lei ah nu le pa nih an thiam ter dih cang hna. Abianabia ah lehtama rian in a paw aa cawmmi innchungkhar an si ah cun fapa nih kum 12/13 a phak tikah cun a pa rian kha a tlangpi in a thiam dih ve cang. Cu bantuk thiamthiam in fanu zong nih nu dirhmun nih thiam awk timi kha a thiam dih cang. Hihi Judah phung cawnpiaknak lei ah duh a nun tuknak a si ve. Cucaah cun ngakchia pa nih phungbia cawnpiaktu hna ar lengmang in bia a hal khawhmi hna hi khuaruahhar thil a si tuk lem lo (caang 46-47). Kannih zong nih hin si dawh a si mi cu chiatha thleidan khawhnak hi kum 12/13 ahhin kan cohlan hna i tipil in tik ah a tlawm bik kum 12 a tlingmi hna kha kan pek tawn hna. Hihi Judahmi tuah tawnmi phung (tradition) hi a zulmi kan lo. A zei a si hmanhah kum nakin biapi deuh ah ruahmi cu nawlbia nih a chim bang khan kum 12 a tlingmi nih Lanhtak Puai zawh ah Jerusalem Biakinn phanh ding timi zulh ding phung tlin ter kha a si. Hi tluk in a biapi mi phung kha Josef le Mary nih an rak tlinter.[1]

Ngakchia pa nun ah nu le pa hmanthlak kha fiang ngai in a lang. Johan kong ah siseh, Jesuh kong ah siseh Luka nih hin a uar ngai mi bia cu ngakchia an thannak kong hi a si. Johan kong ah: “Ngakchia cu a hung thang i thlarau in a thawngmi a si,” a ti (Luka 1:80) i Jesuh kong ah voihnih tiang a nolhmi cu pum lei le fimnak lei in a thang i kaphnih in mithmai tha a hmuhnak kong a kan chimh (Luka 2:40 le 52).[2] Luka nih ngakchiapa a thannak kong ah fimnak in a thannak kong hi a hlawi duh ngaingai. Phungthlukbia cauk zong khi fimnak in kan than khawh naklai a kan cawnpiaktu cauk a si. Ngakchiat lio tein lung fim tein than hi a biapi tuk mi a si. Cu pin ah Jesuh nih “Ka pa inn ah ka um awk a si ti kha nan hngal lo maw?” tiah a nu le a pa bia a lehmi hna nih aho a si a hun i hngalhnak a langhter ngaingai. Biakinn cu a Pa inn a si a ti pin ah Pathian cu ka Pa a si tiah Jesuh nih a rak ti.





--------------------------------------------------------------------------------

[1]Chanthar Khrihfa Fimcawnnak ah an kan chimh tawnmi cu ngakchia hi bawhte a si in kum 6 tiangah hin thil biapi bik cu aa cinken cang an ti. Hihi a dik ahcun Moses kha a nu taktak sin i kum 6 tluk tiang a um khawh kha a rak za ngai ti awktlak a si ko hnga. Siangpahrang fapa dirhmun bantukin caantha tuk a hmu ko nain a miphun a dawtnak hi khuaruahhar lei ko khi a si. Siangpahrang fa bantuk sinak kha i thim lo in ralzaam sinak tu a rak i thim.

[2]Nihin ni ahcun cozah lawng rinh loin khrihfabu cio nih tualleng ngakchia zohkhenhnak (nursery/day care) kan ngei kho hna i lawmhnak nganpi a si. Miphun rumra a ngeihnak le ruahchannak cu kan fale nuncan ziaza le fimnak cungah aa hngatmi a si.