Nun Thinhnak

Ramcar Authawng: Nun Thinhnak



Baibal caang thim: “ Nan nun thin u law tipilnak ing u. Cun Pathian nih nan sualnak an ngaihthiam hna lai,” a ti. Luka 3:3

Tipil petu Johan nih Pathian pennak kong ah lam sialtu, tlangau tu a sinak kha a caan a hun tlin tikah a hun phuan. Ramcar chung in awthawng a hung thangmi cu nun thinhnak[1] thawngtha a si. Caang thum le caang riat ah hi nun thinhnak hi biapi tuk in a chim. Nun thinhnak nih Pathian lei in ngaihthiamnak kha a sawm. Nun thinhnak le ngaihthiamnak hi aa then kho lo. Pathian he a thukmi pehtlaihnak kan ngeih khawh nakding ahhin mah sining i hngalh le cu i hngalhnak chungin aho fial chom, hnekchom lo tein i ngaihchihnak, i chirnak lungthin kha nun thinhnak i a thaw, a hrampi cu a si.

Tipil innak kong hi Johan au thawng ah ngaihthiamnak tehte hmelchunhnak bantuk in a hung lang. Judahmi hna caah tipil in hi sullam thukpi a ngei. Thiannak hmelchunhnak a ngei i innchungkhar tling sinak asiloah phunhrawm khawhnak sullam zong a ngei. Cu pin ah damnak hmelchunhnak zong a si fawn (e.g Naman). Johan phungchimnak hi hmual a ngei ngaingai. Mi tampi, phu tampi nih an fuh i nun thinhnak tehte a simi tipilnak an ing ti kha Luka nih a kan chimh.

Dinnak, biatak kha Johan nih cun raltha ngaiin a rak chim. Ram uk bawi zong a hual hlei lo. Harnak a ton ding zong kha a tih hlei fawn lo. An chim tawnmi cu dinnak hi pa hmanthlak an cuanter i namte a har tukmi bantuk a lo ti a si. Cu caah cun dinnak bia nih cun mi tampi a ah tawn hna ti a si. Johan nih dinnak, biatak a phuan tik ah Herod caah cun namte chunh le ah bantuk cu a si taktak ko. Cu dinnak bia a simi nam ahnak nih cun Johan cu thong ah a thlak ko. A zei a si hmanh ah Johan phungchimnak hi ruahchannak authawng (voice of hope)[2] pakhat a si.

Sualnak cu zeidah a si ti cawn hau lo tein biatak cu Johan nih a rak aupi ko. Nan sualnak in i mer u a ti colh ko hna. Phuhrunnak zeihmanh um lo tein biading chim ngamnak hi Johan nun ah a um. Cucu a chuah hlan hrim ah Thiang Thlarau in a khat lai a timi nun ruang ah khan a si kan ti khawh ve ko hnga. Thlarau in a khatmi hna nun ah hin biatak a um i dinnak a aupi ngam zungzal. Mipi nih an hun uar tuk i Messiah a si rua an ti lio ah Johan cu a rak i porhlaw lo. Lam sialtu lawng a si kha raltha ngaiin a phuan ngam. Nun thinhnak thawngtha a rak chimchungtu a si kha tehte a khaan.



Biahalnak

01. Nun thinhnak le sual ngaihchihnak hi an i khat maw?

02. Tipil in hi a herh maw? Ngaihthiamnak he pehtlaihnak a ngei maw?

03. Dinnak hi ziah namte bang a mi ah a fah tuk theo?

04. Johan nih a sining tein a dir ngammi cungah hin zei nunzia dawh dah kan i cawn khawh ve? Kan ram nih tah ramcar authawng hi a herh ve maw?





--------------------------------------------------------------------------------

[1]Kannih Baptist nih hrinthannak kong kan i cawnpiak tikah hin nun thinhnak kong hi fakpi in kan aupimi a si. Zumhnak le nun thinhnak hi aa pehtlai ngaimi a si ti in kan hman thiam a herh ngaingaimi a si tiah ka ruah. Kan pa Rev. James Sangawi le bang nih cun khamhnak kong a chim tikah nun thinhnak hi hmunlai ah a chiah.

[2]Johnson siangbawi pa zong nih hi ruahchannak authawng timi kong hi a rak chim bal ve. Communist phung nih Tuluk ram a hun ciah i Kawlram a hun den ve tikah zapi thilhrawmnak phung nih Hakha te hna hmanh a rak hlanh ve. Johnson siangbawipa a thin a rak phang. Cu lioah Laimi kan pupa zumtu hmasa hna nih thih tiang zumh awktlak in an dirnak ding kong an rak chimh. Ruahchannak authawng a si tiah Johnson nih a rak ti. R. G. Johnson, History of the American Baptist Chin Mission 2, 1210 ah rel khawh a si.