Jesuh Tipil Inna

Jesuh Tipil Innak: Van In Awthawng

Baibal caang thim: “Cun vancung in aw pakhat a rung thang i, ‘Nangmah cu kan dawt mi ka fapa na si. Na cungah ka lung a tling,’ tiah a ti.” Luka 3:22

Jesuh tipil innak nih hin biahalnak nganpi a chuahter. Matthai thawngtha tialtu le bang nih cun hi kong tial hi i harh ngai sehlaw a dawh tiah Baibal thiam hna nih an chim theu.[1] Thiannak, a bik in sualnak in thiannak le ngaihthiamnak hmelchunhnak kha tipil innak nih a langhtermi a si caah biahalnak a chuakmi cu Jesuh hi a sual ve caah maw tipil a in? ti kha a si. Kan hawile Roman Catholic cawnpiaknak ahhin biapi ngai in an hlermi pakhat cu sual ci tel lo fapawinak[2] hi a si i Jesuh hi Adam sual aa hrawmmi a si lo ti hi an cawnpiaknak a si. Cu caah cun Bawi Jesuh tipil innak nih hin mi tampi an lung a tuai tawn hna. A ruang cu Johan tipil peknak kha sual ngaihchihnak he aa pehtlaimi a si caah a si.

Kan sining dihlak i hrawm ding in a rami kan Bawipa Jesuh nih nawlngaihnak lam kha a zulh i Johan sin zong ah tipilnak a ing ve ko. Matthai chim ning ahcun “Keimah pei nangmah nih tipil pek awk ka si cu, ka sin i nangmah lehtu na rat,” (Matt. 3:14 ) tiah Johan nih Jesuh a rak tinak kha kan rel khawh. Jesuh nih “Pathian nih tuah awk a si a ti mi paoh cu i tuah ko seh,” (Matt. 3:15 ) ti in bia a leh i Pathian duhnak kha a tlinter. Luka nih cun hi vialte hi a langhter lo. Jesuh tipil a innak i Pathian a lung a tlinnak kong tu a kan chimh.

Tipil in sullam a thuk bikmi pakhat cu vancung in aw nih bia a kan ruah venak hi a si. Nun thinhnak he Pathian a fuh i tipil a ingmi kan caah, “Ka fa nangmah cu kan dawtmi ka fapa/nu na si. Na cungah ka lung a tling” timi Pathian aw kan theihnak a si. Aw kan ti tik ah thinlung hnakhaw in kan theihmi Pathian aw, a dawtnak, a kan pomhlawmnak dawtnak aw nemte kha a si i Pathian nih a kan tinh piakmi rian lian ngan a si mi vailam tahnak lam i kan kalnak ah thazaang petu aw phun kha a si.

Hi Pathian chimmi bia hi Biakam Hlun chung hmun hnih in lakmi an si. Nangmah cu ka dawtmi ka fapa na si ti hi Salm 2:7 in lakmi a si i Messiah siangpahrang kong chimnak a si ti in lung fianmi a si. Na cungah ka lung a tling, ti hi Isaiah 42:1 chung in lakmi a si i Ingtu Sal (Suffering Servant) kong chimnak a si i, kha Ingtu Sal rian a zik a phaknak cu Isaiah 53 ah khan kan hmuh. Cucaah tipilnak a innak ah khan Jesuh nih fiangte in a hngalhmi cu keimah cu Messiah, Pathian chiti thuhmi Siangpahrang ka si ti le cu nih a sullam a langhtermi Messiah sinak cu sunparnak le lianhngannak si lo in harnak in le vailam tahnak a si ti kha a si. Tipil a innak ah khan Jesuh nih Pathian hnatlaknak a hal i a hmuhmi cu a donghnak i vailam tahnak a in te lainak kha a si. Cu pin ah tipil innak a dih in Luka nih thil biapi taktakmi pakhat a kan chimh rih. Dal 4:1 nak ah “Jesuh cu Thiang Thlarau he khat in Jordan tiva khan a ra kir i Thlarau nih ramcar chungah khan a kalpi,” tiah kan rel khawh. A zei a tuah paoh ah Thiang Thlarau he a khahnak kong hi Luka nih cun nolh a duh ngaingai.


--------------------------------------------------------------------------------

[1]Johan nih Jesuh kha tipil in i a rat ah khan a rak al tiah Matthai nih cun a tial. Matt. 3:14 ah zoh te.

[2]Hihi ‘immaculate conception’ tiah an timi kha a si. Jesuh cu pawi a si lioah khan sual ci in a luat, a thiang tiah zumh i cawnpiaknak hram pakhat a si. Mary hmanh a thianter ti tiang in an zumh phah. Khamhnak ah Mary hi a kan bawmtu (co-redemptrix) ti tluk tiang in an upat i an uar. Cucaah cun mi zeimaw nih RC cu Mary an bia an ti tawnnak hi si dawh a si.