Thiang Thlarau He A Khatmi Jesuh

Baibal caang thim: “Jesuh cu Thiang Thlarau he khat in Jordan tiva khan a ra kir i Thlarau nih ramcar chungah khan a kalpi.” Luka 4:1

Luka thawngtha tialtu nih hin Thiang Thlarau kong hi a chim duh ngai tiah kan chim lengmang bang Jesuh nih riantuan hram a domh lai ahhin cu Thiang Thlarau he an i pehtlaihnak kha a hun nolh than. Tipil a in dih ahhin Thiang Thlarau he a khat tiah a kan chimh. Cu Thiang Thlarau lamhruainak in ramcar chungah khan a kal. Tukforhnak[1] va in ding ah Thiang Thlarau nih ramcar ah a hruai.

Nihin khrihfami tampi nih kan i buaipimi cu Jesuh le Thiang Thlarau kan then pengmi hi a si. Thlarau kan uar tuknak ah Jesuh kan philh tawn i Thlarau kan uarning zong ahhin Pentecost hnu i Thlarau riantuannak phun lawng in Thiang Thlarau hi kan ruah tawn. Ningcang deuhlo in cawlcanghnak kha Thlarau riantuannak ah kan ruah sual tawn. Holh theihlo in holh khawh kha biapi tuk ah hun rel a si. Asinain kannih zumtu hna nih fakpi in kan ruah a herhmi cu Thlarau le Jesuh hi aa then bal lo[2] ti hi a si. Thiang Thlarau riantuannak nih Bawi Jesuh kha Bawi a si a ti zungzal awk khi a si.

Thiang Thlarau he siseh, a Pa he siseh, Jesuh Khrih hi hawikomhnak a ngei peng. Pumkhat an sinak, khat le khat an i pehtlaihnak ah nawlngaihnak tling kha Jesuh nih a langhter pengmi a si. Pathian duhnak zulh kha Jesuh caah a rawl thaw bik a si. Luka nih fiang khun in a kan chimh mi cu Thiang Thlarau he thukpi in an i pehtlaihnak kong hi a si.

Nihin Pathian riantuantu dihlak zong hi Bawi Jesuh le Thiang Thlarau an i pehtlaihnak nih hin a thukmi thil a kan chimh ve awk a si. Pathian rian kan tuannak ah Bawi Jesuh bang Thiang Thlarau he kan khat maw? Thiang Thlarau timhpinak he ramcar chungah kan kal ngam ve maw? Ramcar nih a hun chuahpimi tukforhnak dot

tampi kha kan tong ngam ve hnga maw? Hi biahalnak hi lungthiang te in kan leh ngam ve awk a si. A zei a si hmanhah thil pakhat Luka nih raltha te in a tial i a kan chimhmi cu Jesuh le Thlarau hi thukpi in an i pehtlai ti hi a si.

Thiang Thlarau he a khat timi biatlang hi Lamkaltu 6:5; 7:55 ; le 11:24 ah kan hmuh khawh ve. Steven le Barnabas kha Thiang Thlarau in a khatmi an sinak kha an chim ve.[3] Jordan tiva in a rak kir timi nih Jesuh tipil innak kha a chim i cuka hmun ahcun Fapa a sinak le riantu (servant) a sinak kha kan hngalh khawh. Thlarau nih ramcar[4] chungah a kalpi ti tikah hin Thlarau nih thazaang a pek tinak a si.



Biahalnak

01. Ramcar hi zei he dah kan tahchunh hnga?

02. Thiang Thlarau nih zei chung ah dah a kan hruai tawn ve?

03. Thiang Thlarau he a khat timi hi zeitindah a sullam na lak ve? Lawmhnak, zumhnak le ralthatnak in a khatmi tinak hoi hna a si hnga maw? Asiloah fimkhur tein a kan um ter, lih a kan chimter lo ti hoi hna a si deuh hnga maw?

04. Nihin zumtu zeimaw zat nih Thiang Thlarau le Jesuh hi ziah an then tawn hna hnga?
--------------------------------------------------------------------------------

[1]Tukforhnak ti tikah hneksaknak ti zong in a sullam fian khawh a si ve.

[2]Dr. Miyon Chung nih Pneumatology timi a kan chimh lio ah biapi ngai in a chimmi cu Thiang Thlarau riantuannak kong ruah tikah Jesuh he then lo ding a si ti hi atu lio Pentecostal pawl nih an lung a hung pem ve cangmi a si a ti. Thlarau an ti tuknak ah Jesuh nih zeitindah a ti ve ti kha thazaang an pek lo tik ah fimkhur tein an um kho tawn lo i tukforhnak phunphun chung ah rap bang an i foihnak hi a si a ti.

[3]Word Biblical Commentary Vol. 35, 178 ah zoh. Thlarau in ka khat timi biafang kan hman tik ah kan ram nih nihin i kan uarning ruahchih a hau ngaimi a si. Thlarau in ka khat i ka sual kho lo ti hi tih a nung tukmi zumhning a si. Thlarau in ka khat i ka sual lo kho titu hi kan lungput a si awk a si hnga. Paul nih cun Thlarau kong a chim tikah kan chiatha thleidannak lungthin he a then ter lo (Rom 9:1-2). Thiang Thlarau nih kan chiatha thleidannak a uk zia kha a kan chimh.

[4]Ramcar hi Luka 8:29 le 11:24 ahcun khuachia pawl bualcelnak tinak khi a sawh duhmi a si.