Tlaih Fung

Miphun a liannganter tu cu dinnak a si. (Phungthlukbia 14:34)

Friday, August 6, 2010

CHIN MI KHRIHFA ZAPI TEN KHRIH AH UNAU PUMKHAT KAN SI

Chin mi Khrihfa unau pumkhat si in pom rem awk thei lo nak ka hmu lo
HM: Aug 2010.


Kawhhran thuanthu:

Laitlang khaw fatakte ah ka suak ih ka nauhak lai cu ka nulepa hi Khrihfa an rak si lo ruangah ka pa seu, ka pa u, ih kaihhruai nak in Baptist kawhhran ah ka rak um. Sunday School zir in khawm tinte Pathian thu inrak zirh. Nauhak lai te ihsin piangtharmi ka si. Ka pa seu thih hnu ah Presbytetian, Rev. Khaw Ro Mang bial ah ka rak um. Cun, Falam phunhra tlawng ka kai lai khalah Presbyterian ah ka rak um. Mino Gospel team ah tla ka rak feh ve. Cui hnu ah kan ramah Fundamental, Gospel kawhhran pawl an rung suak tikah Gospel Baptist ah ka rak lut. Lai Khawte le Hakha ah Gospel kawhhran sungah a kumtelin ka rak um. 1990 hnu lamah Mizo ram India ka thlen hnu ah Aizawl vengpi, Mizoram Baptist kawhhran ah a kumtel in member in ka rak um. Delhi ka thlen tikah kawhhran tintian kawmkhawm in DBCF ah kum ziangmawzat member ka rak si. USA ka thlen hnu ah New York State ah First American Baptist Church member ka rak si. 2002 ihsin Indianapolsi, Indiana, USA ah ka um hnu ah kawhhran tintian kawmkhawm Laimi unau pawl pawlkom awknak kawhhran sungah ka um. Zirnak lamah collge level kum 12 sung fultime in Bible lam kum 6, secular kum 6 ka rak zir. Indianapolis ka thlen hnu ah kan kawhhran sungah pastor dangdang, Gospek kawhhran pastor, Baptist pastor, AG pastor, independent, pastor, Nazarean Church pastor, tvp in thu an rak sim. Cu hmuahhmuah lakah ka hmuhtawn mi le ka zir mi, le Pathian ka biaknak ah Laimi Khrihfa ti aw pawl unau vekin pom rem awk thei lo nak ding khawpin zumnak thurin danglamnak ka hmu lo. Ka hmuhmi cu a dikbik ka tinak si loin ka hmuh le ka nunpi mi thu ka simmi asi. Kawm khawm awk thei lo nak cu milai tisa khawruah, lungput, hmudan bittakte ihsin a suak mi asi.



Zumnak thutlangpi:

Laimi Khrihfa pawl dinpimi zumnak thutlangpi khaikhawm zoh tikah Pathian thu, Bible, sersiammi, hell le vanram, sualthu le vanram kainak le leitlun damsung nuntudan thu, tvp, ka zoh tikah ka theihban cinah umkhawm thei lo ding khawpin danglamnak ka hmu lo. Pathian in vanram ah hmunkhat ah retkhawm theih lo ding khawp in danglam nak Bible in a simmi ka hmu lo. Vanram ah Pathian in laimi pawl hi room/khan dangdang ah a hran ten hmu aw lo ding in a ret rero kan tul ding ka zum lo.



Ziangkim sersiamtu cu Pathian nung asi ti kan zum. Pa, Fapa, le Thlarau Thianghlim Pathian kan zum theh. Mihrek in thumkom Pathian silo in Pathian pakhat asi an ti na in Pa, Fapa, le Thlarau Thianghlim cu pakhat asi tiah an ti na in hmin dangdang in an ko thotho tikah an zumnak thuhram taktak si loin milai tongkam hmanmi a danglam sawn mi asi in ka hmu sawn. Sim duhmi cu vanramah hmunkhat ah retkhawm theih lo ding khawp in Laimi pawl zumnak thupom danglamnak ka hmu lo. Milai tongkam in simfiang theih lomi Pathian ih thu an simmi asi tikah milai theihnak le tongkam bungrua in a daih lo mi thil asi tikah an thurin a bang aw lo siloin an tongkam hman mi bang aw lo tlukfang in ka hmu hai! An sinak taktak thu ahcun an parah thuthen ding tlak ah ka ruat aw lo. Asi khal ka si lo.



Pathian in A Fapa neihsun Zesu Khrih leitlunah a thlahnak cu milai tluksiatnak, Adam ih sual ruangah asi ti kan pom theh. Sual cu Pathian thawn um tlang thei lo, Pathian mizia thawn a kalh aw mi asi ti kan zum. Cutin Pathian in Amai hmuihmel kengih sersiam mi a tluse zo mi milai cu Fapa Zesu Khrih ah kan sualman peksak in in rundam zo asi ti kan zum. Cuticun Fapa a zumtu pawl cu Khrih ah pumkhat kan si ti kan zum. Pa Pathian ih zangfahnak liolio in Khrih Zesu ah zumnak in rundam kan si ti kan zum theh. Thlarau Thianghlim in Khrih ah baptisma in pe ih rundamnak cotu pawl hmuahhmuah a kumkhua in vanramah kan ceng ding ti kan zum. Cui ni a thlen hlan lo him damten inkilvengtu dingah Thlarau Thianghlim ih seal khen mi kan asi. Cutin rundamnak co zo tu pawl cu tisa sualsal ah tang nawn loin leitlun nun cu Khrih hrangah nun thiamhlimnak Bible in in zirh vekin nung ding kan si ti kan zum. Cuticun Khrih ratsalnak ding hngak in leitlunah Pathian duhmi tuahdingin nitin kan nung. Cuticun kan sungah Thlarau Thianghlim uknak kaihhruai nakin kan tisa mizia cu kross ah nitin khenbet asi ih kan sungah Pathian mizia tthanlen ter asi. Cutin kan leitlun nun sungah Pathian duhmi ttuansuak dingin zumtu pehtlaih awknak a bur pawlkom kan nei ih cucu kawhhran tiah kawh asi. Nitin satan lalram tthiahbal in Khrih ih lalram hnuai ah zumtu pawl kan tlangleng. Khrih cu a rasal dingin a mah zumtu hmuahhmuah kumkhua nunnak sungah inhruai dingih Amah a zum lo tu hmuahhmuah kumkhuan hremhmun ah thlak dingin thu A tthen dign asi ti kan zum.



Biak inn sungah Pathian biak tikah music on a ring maw, hla khi a niam maw sang maw, an aw a por maw fem maw, ziang hla bu an hmang, keyboard maw khuangpi maw an hmang, an za an beng maw, an kut an bawm maw, tokham parah an to maw, zial parah an to maw, kedam an phawih maw, boot an hruh maw, an za an bawng maw, an kut an vai maw, ding in hla an sak maw, to in hla an sak, zapi a bur in thla an cam maw mi pakhat in a cam maw, thusimtu a au ring maw aw nemten thu a sim, ziangvek Bible versian an hmang maw, laitong maw an hmang kawl tong maw mirang, milai an tam maw an mal maw, nunau an tam maw mipi an tam, testimony an sim maw an tap maw an hni maw, an thawhhlawm a mal maw a tam maw, an khawm a rei maw a rei lo maw, solo le abur hla a tam maw a mal maw, hla an thiam maw solfa khi an hmang maw, thusim tu in ziang thu a sim uar, rundamnak thu maw a sim tam khristian nun, Khrih ratsalnak thu maw sersiam mi thu, biak inn sungah an khawm aw maw hall khan ah an khawm aw aw, pumpuar in an khawm aw maw rawl ei loin an khawm aw aw, thlakhat ah bawipa zanriah voi ziat an hmangih ziangtin an hmang, ti an hnim maw an thlerh maw, an tihnim nak ti a fim maw a bal maw, thla an cam tikah an ttap maw an kun maw an to maw, an rak maw an thir thlohthlo maw, Pathian hmai ah an kun tikah tih le tthia in an um maw an lung a awi tuk maw, rundam nak an co tikah vancung insang sungtel an sinak theihter an si tikah lungawi in an khir an zuang maw an tap an rak maw, rundamnak ahlo thei ti an pom maw hlo thei lo ti an pom, bawipa zanriah ah rawl ngai maw an ei sang, cu hmuahhmuah pawl hi leitlun tawp tiang danglamnak a um ringring dingmi asi. Hivek thu ah bang awk lo nak ruangah Khrih ah pumkhat kan sinak a danglam ter lo. Vanram ah umtlang thei lo nak ding thu ka hmu lo. Ka ruahdan le hmuhdan vekin a pom lotu pawl khal an sual cuang lo ih an that cuangnak khal ka thei lo. Ka ruahdan, hmuhdan, pomdan in lai a rel lo ti ka thei. Pathian ih duhdawtnak cu milai ruahnak theihnak bang awk lonak hnakin a thukin a kau sawn asi. Rei lo te sung daih dang lam nak hin a kumkhua daih Pathian dudhawtnak, Khrih ah pumkhat sinak a siatsuah thei in ka ruat lo. Kei misual hman irundam asisi. Pathian in a pom thei lomi sualnak cu fiangzetin Bible in a ngan. Milai hmuhdan le pomdan danglamnak men ruangah Pathian in A thinlung A thleng dah lo ti ka thei fiang. Milai rundam ding ah le zozo vancungramah an lut ding ti thu lairel dingin Pathian in milai zohman a rawn lo ti ka fiang. Vanram ka kai ding thu ah zohman Pathian in irawn lo ih midang vanram lut ding thu ah thuthluknak tuahnak ah ka tel dah fawn lo. Chinmi khrihfa pawl danglamnak cu nepte asi ih a kumkhua daihi Thutak thurin tlangpi ah kan bang awknak hi tthentthek theih asilo.



Milai ek thawn maw caw ek thawn maw rawl a suang khal le Ezekiel cu Pathian siahhlawh asi. Ngapi pumsungah bawrhhlawh tawm thawn a um lai khalah Jonah cu Pathian siahhlawh asi. Paul cu ril curco in le Peter cu thir le tlu in a um lo ruangah an pahnih lakah danglamnak a um lo, an rianmi cu pakhat asi. Ngakai Piter le danthiam sang Paul khal Pathian siahthlawh “Bawipa, itlansan aw, kei cu misual ka si” ti in le “Misual lakah misual khawmbawl ka si” tiah tangdor zetin Khrih dungthlun in Pathian riantu veve an si. Kharbawk sa ei in a khawsa tu John Baptisma petu khal nautatnak ding zianghman a um lo Pathian mithmuh ah mi ropi bik asi sawn.



Semtirnak bungkhat cangkhat ihsin Thupuan bung 22 cang 21 tiang, Pathian Thlarau in a kamsang le Dungthluntu pawl hmangin Bible a ngan ter tikah Pathian thinlung sungah ziang a um, cun kum 2000-3000 hnu ah cui thu cun leitlun miphun mibur pawlkom le mimal zapi te hrangah ziangtik lai khalah ziangvek dinhmun khalah Pathian in san a neihter mi ka thei theh asi titu an um asile a simmi ziang asi ti a thei lo asi. “Famkim loin kan thei ih famkim loin kan sim” ti ah ngan asi. Pathian Thlarau tel lo theihnak cu milai porh awknak a suahter ih Pathian Thlarau tel lo biaknak cun Pathian Thlarau cangvaihnak a dodal asi. Pathian Thalrau Thianghlim ih kaihruai mi biaknak cun Bible Thutak sungah mi A kaihruai ih Pathian mizia cu zumtu pawl sungah a tthang lianter: Pathian duhdawtnak cu an sungah a nungih nunnak cirhti an sung ihsin a luangliam sawn asi.



Zumnak nung, thurin thianghlim, Bible thutak cun zumtu pawl nunah Pathian duhmi tumtah le mizia a phuang suakin a nunter ih ram le miphun thuanthu khal a tuahtha in a fingkhawi asi. Bible thurin dik le thianghlim nunpi nak in milai pehtlaih nak a tuah tha; Bible thurin nunpi tu kumpi cozah, khua le ram, veng le mibur umkhawmnak ah senpi vangtlang le mipi hrang thuthluknak tinkimah dingfelnak in ziangkim lairel asi tikah biaknak, rampi kaihhruainak, le pursawm leilawn, milai pehtlaih nak pawl a hrisel ter, a thianghlim teriih rualremnak rualrannak a suahter sawn asi.



Dunglam thuanthu ah ziangvek kan rak kalkan zo khal asile tuisun Laimi khrihfa pawl cu kutkai in Khriha ah le miphun ah pumkhat sinak nunpi thei dingin Pathian Thlarau kan miphun lakah a phuang suak aw zo asi. Pathian duhdawtnak a phuang suak aw mi hnakin a tum sawn mi Chin/Laimi zumtu Khihfa pawl tthenthek thei tu ding thutak a nungmi ka hmu lo. Thenthek ter tu cu rei a daih lo dingmi, Satan hmanrua, milai theihnak tlaksamnak, milai bulpak hmakhua sialnak pawl lawng asi sawn.



Zumnak nung cu milai phurnak le ruahsannak lenglam ah a um ih a cangvai mi asi:



Milai phurnak le ruahsannak cu milai taksa in a dai thei mi, hnasungah theihthei mi, hmuh thei, thamthei, suangtuah thei mi parah a hngat aw aw. Sihman sehla zumnak nung cu milai suangtuahnak le mithmuh thei mi lenglam ah a um. Abraham cun milai suangtuahnak ih ruahsan ding a um lai khalah a zum. Milai phurnak kalh zawngin Abraham cun a fapa neihsun cu Pathian hnen thawinak pek dingin Moriah tlangparah a kaipi. Milai cun amai suangtuah nak le kawruah nak ah amai hrang thatnak hlawknak thlenpi tu ding lawng a ruat in a duhdawtih a ngaina. Sihman sehla zumnak nung cu milai suangtuahnak le phurnak lenglam ah a cangvai sawn asi. Curuangah milai tisa cun Pathian thutak theihtheinak a nei lo ih suangtuah suak thei nak khal a nei lo. Curuangah milai tisa cun Pathian Thlarau a dodal ih Pathian Thlarau duhmi a hua. Curuangah milai tisa cu nitin kross parah khenbet ringring in a um a tul. Milai tisa khawruahnak ihsin a suak mi cun vanlam theihnak a dodal. Curuangah milai in Pathian a biak tikah tisa thinlung phurnak le lungawinak lenglam ah thlarau in a biak a tul. Cuvek thotho in a kiangkap milai apehtlaih tik khalah milai tisa thinlung phurnak suangtuahnak sungah a pehtlai asile milai pehtlaih awknak sunglawngin a ruat ban ding: kawhhran pawlkom, hrin le hram, phurzawng bang aw, khawkhat, ramkhat suak sinak, thuanthu ttawm aw aw, tvp lawng parah hngat aw aw in midang a pehtlai ding. Sihman sehla, Pathian Thlarau in a uk mi, Khrihfa pawl cu leitlun mithmuh theih milai pawlkom awknak le pehtlaih awknak si loin Khrih ah pumkhat sinak sawn cu thupi sawn ah ret in pehtlaih awknak tuhpiter sawn ding kan asi. Curuangah Khrih ah a pehzawm aw mi, Chin mi khrihfa zapi ten pumkhat si thei lonak pom rem awk thei lo nak ding zianghman a um lo, milai tisa satan hmanrua lawng a um. Khrih ah zumnak nung nei in thlarau mit a meng tu cun tisa thinlung in a suangtuah nak le phurnak, milai pehtlaih awknak pawl cu thihter tahratin Khrih ih ruangpi a kawhhran pehzawm tu hmuahhmuah cu unau pumkhat vekin pehtlaih pawlkom aw thei ding mi kan asi.







Theihnak: Ka ludur sungah a ummi, kuhsikhar tia te ka thluak in ka ruah thei mi cu lei le van sersiam mi hmuahhmuah thawn ka tahtthim tikah ka theihmi hi a mal tuk lawmman ruangah Pathian in A sersiam mi pawl cu sankhuk rei ihsin Amai tumtah vekin Khrih ah a lakkhawm sal dan thu thawn peh aw in zianghman thuthen thei ka si lo ti ka fiangaw. Ka theihmal zia ka ruah tikah ka theih lomi pi ningzah thlak takin ka rak ttong pang maw ti ah Pathian hmai ah ka kaa sung ihsin a suak mi ttongkam thu ah ka lu ka kun. Pathian in A Fapa thisen in a lei mi, A duhdawttuk mi, A Fahniang pawl parah ttongkam sia, dik lo zetin thu ka rak tthen pang maw ti ka cek awk fel tikah ka hngilh zo mi lomi tongkam tampi a um asi ti ka theih awk tikah Pathian kehramah lukun in sim ding hman thei loin sual mizia ih sal ka thinlung hi ka hua thlohthloh theu. Curuangah “thu tthen hlah” “Don’t judge” tiah Zesu in thu incah mi hi ka lungkim thlepthlep.



India scientist pakhat in a sim dah mi cu ‘million lenglo Ni (Sun) a um ding a zum um” ati. Leilunpi (palanet) pakua a um tiah scientist pawlin an sim. Santhar fimthiamnak ih tuah mi lamhla pi zohnak thawn an zoh khal asile vanparah arsi ziangzat a um ti an siar thei hrih lo, ziangzat an um, kan umnak leilung ihsin ziangtluk an hla, arsi sungah ziangvek a um, tvp, zianghman theihtheih nak milai in kan nei lo. Kan umnak leitlun pi le Ni (Sun) peng 93 million a hla tiah an ttuat. Kan umnak leitlungpi parah tu rori ah milai billion 6 lenglo kan um. Voikhat thli ka hnar kua ihsin ka thawhlut le suak karah ah mi pakhat a thi ringring ih naute pakhat tal a suak ringring. Leitlun sersiam thawk ihsin milai ziangzat an um? A tufang leilungpi parah a nungmi milai billion 6 lakah ka theih mi cu 100-1000 tluk hman an si lo ding. Ka thei ka timi hman ka thei ngaingai lo, an taksa ruangpi ruangzing dan, nundan, duhdan, an dunglam le hmailam thuanthu pawl an thu hla ka theihmi a mal tuk. Kan umnak leilungpi parah ram 200 lenglo a um. Ka thlen dahnak cu ram malte lawng asi. Ka thlennak ram sung, state, khua, veng sung thu hman ka theih mi a mal tuk. Aw! Ziangvek milai saw ka si? Pathian mithmuh ah ziangvek saw ka si? Aw, ziangvek milai saw ka si? Ka hnar phaw puar tahratin leile van ziangkim sersiamtu ih cangvaihdan cu ka lun sungih kuh-si khar tia lo ka thluak ih ruat thei mi sugnah ka ret tum? Aw, ziangtluk zangfak za saw ka si? Leitlun sersiammi le a sungih thilcang mi pawl lakah Pathian in itheihter mi le kuhsikhar tia lo ka thluak in ka theih thei mi cu thilcang mi hmuahhmuah cu tipi thuamthum tluk sisehla ka theih mi cu tikhu zam tluk hman asilo.



Zo saw, li-hawng kuar sungih tlaklabeu te in “ka umnak tilipi hi leilung tlunah a tumbik tipithuanthum asi” a ti an ti bangin zo saw a awr phawpuar tahratin hngal zetin Pathian hmaiah a theih lomi thu a au kio rero ngam ding?



Pathian in A duhdawtih A Fapa neihsun a pek, an sual A ngaidam ih ‘Ka fa hniang” tiah A kawhmi pawl cu camse rero cingin “Pathian, ka lo duhdawt tuk” titu cu ziangtluk zangfakza so asi ding?



Thutak theihnak, theihnak dik, vanlam ihsin a ra mi cun milai zalennak a pek sawn asi. Sual sal ihsin zalennak mi a pek sawn asi. Cui zalennak cu thlarau zalennak, sual le satan sal ihsin zalennak asi ih sual tuah loin um theinak le Pathian duhzawng tuah thei nak zalennak sawn asi. Khrih ah unau pumkhat duhdawtnakin pehtlaihnak a luansuah nak zalennak asi. Cui Thutak sung ihsin Pathian Thlarau A phuang suak aw sawn ih Pathian ih mizia cu thutak sung ihsin zumtu pawl nun sungah a phuang suak aw sawn asi. Satan bumnak theihnak dik lo cun milai porh awknak, midang huatnak, zohniam nak, mah le mah khaisawn awknak, lungrual lonak, tthentthek awknak, lamtang tuah awknak, milai cawisawn awknak, tvp, a suahter tikah satan mizia phuan suah awknak asi. Pathian thutak cun Khrih dungthluntu pawl a tthentthek loih Thlarau pakhatin Khrih ih ruangpi sugnah Baptisma a pek sawn asi. Tangdornak, pumkhat sinak, tumtah le duhmi hmunkhat nak, duhdawtnak a hringsuak sawn asi. Cuticun tisa le thlarau cu a thleidang ih milai sunglam nunah thlarau le tisa cu an do aw ringring. Thlarau Thianghlim hnatuannak in tisa thinlung cu satan hmanrua asi vekin zumtu nunah nitin thihter, khross ah khenbet sawn in a um. Cutin vanlam Thutak theihnak in tisa, leitlun le satan cu neh in a um sawn ih Khrih ah zumtu unau pawl cu pumkhat, taksa peng zawmpi, pumkhat nun a suahter sawn asi. Ziangah tile Khrih ah zumtu zapi ten sankhuk in Pathian insang ah unau kutza kai in a nung tlang dingmi kan si. Vanlam ihsin a ra mi Thutak theihnak dik cun Khrih ah unau duhdawtnak, pumkhat sinak, unau tlaihsannak, lungkhat ten Pathian riannak a hringsuak sawn asi.





Duhdawtnak: “Pathian cu duhdawtnak asi.” Pathian ih duhdawtnak, keimah iduhdawtnak, ka theih vivo tikah, keimah le zumtu unau karlak ah ri-kham ummi hnakin Pathian ih duhdawtnak cu a tum in a thuksawn asi ti ifiang ter. “A unau a duhdaw lo tu cu Pathian a thei lo asi” ti ah ngan asi. A thianghlim Pathian hman in a duhdawt ih a ngaidam zomi, kumkhua vancung ramah umpi dingin “fahniang” tiah A kawh mi pawl sawisel relsia thangsiatu ka si pang ahcun Pathian ih umnak vanramah hmun ka nei lo ti ka thei aw. A thianghlim Pathian hman in a ngaidam ih A pomrem zomi sawisel relsia thangsiattu, duhdawt thei lo tu ka si ahcun ziangtluk ningzakza saw ka si? Thing kross parah thihnak tiang tuarttu Bawi Zesu rori in a ngaidam zomi ngaidam thei lo tu ka si ahcun ka sungah Khrih ih Thlarau a nung lo ti ka fiang aw aw. Pa Pathian ih duhdawtnak, Khrih sungah, Thlarau Thianghlim in ifianter tikah ka sung ihsin Pai duhdawtnak cu a luangliam sawn mi asi. Keimah tisa ih duhdawtnak cun kei le keimah cu thupi bik ah retin ka insang, sungkhat, hrin, khua le ram, miphun, kawhhran pawlkom, “ka” ihsina thawk mi alwng ka duhdawt thei. Asinan, ka lei tisa cu khross ah khenbet, thihter asi hnu ahcun Pathian in A duhdawtmi pohpoh duhdawt in “A” ihsin a thawkmi duhdawtnak sawn cu ka sungah a nung sawn asi. Pa’I duhdawtnak cun Khrih ah zumtu unau zapi ten pumkhat lungkhat pu ah in sersiamthar sal ih Khrih ih lungput cu kan sungah a nunter sawn mi asi.



Ngaidamnak: Pathian in keimai sualnak hman ingaidam asi ahcun midang sualnak cu a ngaidam tuk ding ti ka zum. Keimah tluk mi sual hman ingaidam asi ahcun ka kiangkap ah mit in ka hmuh thei mi Khrih ah zumtu unau pawl mawhnak ka ngaidam lo ahcun ka hngawngrek in hellram ah nam thlak ding ka si ti ka thei. Pathian ih sual ngaidamnak tep zo tu nunpi tu cun a parah ziangvek mawhnak neitu, unau pawl mawhnak sualnak pawl khal a ngaidam thei ih an nun rem awknak ding ah nunsimnak siar lo, huatnak, dodalnak hrimrhim a sunglamah a nunpi lo asi. Pathian mizia cu a sungah Thlarau Thianghlim in a nunter tikah ngaidamnak, duhdawtnak in a khat sawn asi.



Mi zokhal a unau a hua ih a dodal rero tu cu a thlarau raal zo asi ti a thei loih a raal pa ih hmanrua ah a cang asi. Mi zokhal Pathian ka duhdawt tisi Pathian in Amai hmuihmel kengin A sersiam mi A duhdawt tukih A Fapa thisen in A tlen mi milai duhdawt thei lo tu cu bum in a um tinak asi. Mibum tu, thuphan hmuahhmuah ih pa cu satan asi fawn.



Khaikhawm: Chin mi Khrihfa unau pawl pumkhat nun in Khrih ih duhdawtnak sungah nuntlang thei lo nak a um lo. Cutin titikah Khrihfa ka si ti pohpoh vanram an kai theh ding, piangthar theh an si ti nak asi hrimhrim loih kawhhran cu leitlun ah a umsung cu buhtak le buhlem an um tlang ringring ding ti thei cingin Pai duhdawtnak in Khrih ah Thlarau Thianghlim ih tihnim mi pawl Khrih ih taksa peng zawm zumtu unau zapi ten pumkhat lungkhat pu in Pathian rian tlang ding kan si timi hi Bible in in zirh mi Pathian hmin kan sunlawih thei nak le kan miphun tuahtthatnak hrang hrangah lamzin asi. Milai hmuhdan pomdan ruangah danglam nak hnakin Bible in zumnak thupom tlangpi in zirh mi thuhrampi (basic principles) kan zumnak le nunpi dan a bang aw theh ih pumkhat kan sinak a lang asi. Chin mi Khrihfa pawl cu zumnak ah le miphun ah Khrih ah pumkhat kan asi. Pathian hmin thangthat si ko sheh!
Hre Mang

No comments:

Post a Comment