Jesuh cu Zeitindah na pom?

Marka 8:29
Cun annih cu, “nannih nih tah, aho a si, nan ka ti dah?’ tiah a ti hna I, Peter nih, ‘Messiah na ti’ tiah a leh.

Thlacamnak: ‘Ka Pa, nihin tiang kan nunnak na zuahrih caah ka lawm I na min kan thangthat ko. Na bia cu nangmah lila nih kan dihlak caah chim tthan ko tiah sawm bu in le na kan chimh ti zumhnak he Bawipa Jesuh min in thla ka cam. Amen.’

Pathian fale hna, Bawipa hi a ttha tuk. Dallas ah zarhkhat dengmang ka va tlawng I, dam tein tuzing arkhuang ah kan khua ka phan tthan. Dallas ka um lio ah thlaraulei thaithawh voihnih ka rak ttial. Nan rak hmuh cio lai tiah zumhnak ka ngei. Dallas lei unau pawl zong an dam lio te a si tiah theihter kan duh hna.

Dawtmi hna, kan Bawipa Jesuh zeitindah kan hmuh timi nih hin zeitindah na cohlan timi kha biakhiahnak a ngeih ngaingai ko. Chimduhnak cu, Jesuh cu damter tu tiah na fuh ahcun damnak na hmu ko lai. Jesuh cu kan himnak le lungpi a si tiah na hmuh ahcun, na himnak lungpi a si hrimhrim ko lai.
Dawtmi Pathian fale hna, Nazaret khuami caah cun Jesuh cu mi sawhsawh a si ko. An mitka hmaika ah a tthangmi a si caah biapi ngai ah an ruat lem loh. ‘Mah pa hi lehtama fapa kha a si lo maw? Mary fapa kha a si lo maw? A unau Jeim, Jude, Simon te pawl an si lo maw? A farle cu kan sin ah pei an um ko hi’ (Mtt. 13:55-56) An nih khua caah cun Jesuh cu biapi thlapa a si lem loh. Mi sawhsawh te kha a si ko. Pathian sinak a ngeimi minung a si kha an hngal kho lo. Dangkhat in kan chim ahcun, thlaraulei ah an mit a dei kho loh, cu caah an khua ah khuaruahharnak a tuah kho lo, tiah kan hmuh.

Dawtmi Pathian fale hna, nihin vawlei kan zohtik ah, mifim mithiam tampi caah Jesuh cu zohchun awk tlak hruaitu ttha menmen ah an hmuh. Mirum hna le thil tikho tiah ruahmi hna mit ahcun, Jesuh cu nunzia cawnpiaktu ttha menmen ah hmuh a si. Minung vialte hi amah bantuk in kan nun khawh ahcun vawlei hi a tthadeuh ko hnga mu, tiah saduh an that lengmang.

Dawtmi Pathian fale hna, nangle kei cu kan I dan deuh awk a si lai hih. Van in a hong ttummi van changreu a si kha kan hngal taktak maw cu? (Johan 6:33) Nunnak tinung, tihal a riamh tertu tinung a si kha kan hngal maw cu? (Johan 4:14)
Vawlei sualnak a kalpi tu Pathian Tufa a si kha kan hngal ko lo maw? (Johan 1:29)
Dawtmi Pathian fale hna, Bawipa Jesuh cu vawlei ah zohchun awk sawhsawh ah a ra loh. Kan Khamhtu siding ah a ra (Kalati 3:13) Amah cu kan dinnak a si (1 Korin 1:30) Kan Tukhal siding ah a ratmi a si (Salm 23:1) Kan chim cawk lai lo, dawtmi hna. Kan caah Jesuh hi amak lawlaw mi Pathian a si.
Pathian fale dawtmi hna, Jesuh kan hmuhning le kan pomning nih kan nun ah a kan langhter. Cucaah Pathian Fapa Khamhtu a si kha kan hmuhning le pomning si zungzal sehlaw, cu tthawnnak nih cun kan nun ah khuaruahhar in thil lianngan a ttuan hrimhrim ko lai. A hmu cangmi nun ah a ttuan cuahmah cang. Nang nun zong ah ttuan ding in redi a si.

Bawipa nih sunparnak co ko sehlaw, kan dihlak caah thluachuah kan pekpiak ko seh. Amen.

Rev. Thawng Ling