Sifak le rethei in um ti hlah!

Salm 105:37
Cun Israel mi kha a chuahpi hna, sui le ngun kha an I phorh, an dihlak in an tthawng I an ngan a dam.
Thlacamnak: ‘Ka Pa, na bia cu nangmah nih chim tthan law, na mi nih hlawknak kan hmuhnak hnga Thlarau bawmhnak kan hal. Na kan bawmh ti zong ka zumh caah lawmhnak chim bu in ka Bawipa Jesuh min in thla kan cam. Amen.’

Dawtmi Pathian fale hna, cantha kan hmuh rih caah Bawipa min thangthat si ko she. Nihin tiang kan nunnak a zuah rih caah Bawipa min cu hlorh chin ko u sih.

Pathian fale hna, Israel mi hna sal I an can lio ah khan sifak le rethei ngaingai in an rak um ko. Uktu hna kut in hremnak a phunphun zong an hmuh fawn. An hmape le tukvelhnak cu an keng ah a um leen ko lai. Izip ram nilin lak ah mi tampi cu an ril lai I, an thazang a dih cikcek ko lai. Suimilam can sautuk riantuan sifawn hna lai kaw, an ba hringhran ko lai. Kum saupi mah bantuk I an umnak nih an cung ah harsatnak le derthawmnak tampi a chuahpi ti cu a fiang taktak mi a si.
Asi nain Pathian fale hna, zankhat cu an cung ah thil khuaruahhar mi a tlung, Lanhtak puai zan ah. (Exodus 12) Tuufa thisen kha an innka ba le innkatung I an thuhnak thawng in Pathian zohkhenhmi ah an hong cang. Pathian nih a chimh hna bang in, innchung ahcun lanhtak tuufa sa em mi cu an ei fawn.
Dawtmi hna, mitthlam ah cuan ter hmanh. Mitcaw mi an um ahcun tuufa mit kha an ei ttheu lai tiah ka zumh. Kebei mi an um ahcun tuufa ke kha an ei ttheu lai, lungzawtnak a ngeimi an um ahcun tuufa lung kha an ei ttheu lai. Zinglei a hong chuak I, thil aa phundang cang. Sal dirhmun siti lo in, miluat dirhmun in an chuak. Sifak rethei an si ti lo, thilri chawva suingun he an chuak cang. Izip mi hna nih an thilri tampi kha an pek hna ticu fiang tein kan hmuh khawh. An dihlak in a tthawngmi, a dammi, a rum mi ah an I chuah. Haleluia!
Pathian fale hna, hi thil vialte hi Israel mi hna nih an tonmi le temmi thil an si. Lanhtak tuufa thisen le a sa an ei hnu in an co mi laksawng lawmhnak an si. Asi kun ah, Lanhtak Tuufa taktak a si mi Jesuh Khrih kan Bawipa thisen le a khuaimi a pum nih cun zeitluk in dah rumnak le luatnak thluachuah cu a kan pek chinchin lai?
Na zumhnak cu na aiawh ah a thimi Pathian Tuufa cung ah hngat ko law na si a fak ti lai loh. Na hrum ai kho ti lai loh. Na khuk an tthawng lai I, a thlep mi na ban zong an tthawng tthan ko lai. Nifa tein zumhnak tthawng he raltha tein kal cuahmah ko u sih.
Sifak le rethei in um ti hlah!

Bawipa nih sunparnak co ko sehlaw, kan dihlak caah thluachuahnak kan pek piak ko seh. Amen!

Rev. Thawng Ling