Pathian bia cu a nung I a tthawng.

Hebru 4:12

Thlacamnak: ‘Ka Pa, na bia cu a nung I a tthawngmi a si caah nihin zong nangmah lila nih kan chim tthan ko tiah bawmhhal bu in le na kan bawmh ti zumhnak he Bawipa Jesuh min in thla kan cam. Amen!

Dawtmi Pathian fale hna, cantha a kan I kan nunnak a zuahrih tu Bawipa min thangthat si ko seh. Nihin ah ruah tti ka duhmi cu a tthawngmi Pathian bia kong a si.

Pathian fale hna, pumsa nih rawl thawthaw le sa thawthaw a duh I a herh bantuk tein kan thlarau zong nih rawl thawthaw a herh ngaingai. Thlarau caah rawl thaw bik le pawkhimnak bik a simi cu Pathian bia a si ko. Pathian bia cu kan thlarau caah rawl thaw bik a si ticu ngakchia hmanh nih an hngalh ko.
Asi nain voi tampi cu rawl kan ei duh lo khah, rawl thaw a si ko tiah kan hngal ko nain kan ei duh bak lo khah. Zeihe dah aa lawh tiahcun, cabuai cung ah voksa cawsa chiahpiak ko ttung I, chun nitlak te a pawngkam ah I hel sawhsawh I, ei ttunglo phun kha a si. Ei lo ahcun zeitindah kan paw cu a khim rua hnga!

Dawtmi hna, Pathian bia cu kan rawl thaw bik a si. Kan nunnak zong a si. Matthai 4:4 le Deuteronomi 8:3 kan zohtik ah, minung hi rawl lawnglawng in a nung lo, Pathian bia tu hi a rawl a si, a nunnak a si tiah fiang tein kan hmuh. Cucaah kan rawl thawbik cu Pathian bia a si. Redi in pek kan si, cabuai ah hunpiak kan si cang. I lak I ei ding cu nangmah le keimah rian.

Pathian fale hna, Pathian bia cu kan vainam a si. Efesa 6:10-18 chung kan zohtik ah hriamnam tthabik ral teinak vainam cu Pathian bia a si, a ti. Ralthuam tampi in I thuamh cu a herh ve, a thuamh zong kan I thuam. Asi nain teinak hriamnam kan vainam cu Pathian bia a si. Pathian bia kan I kenlo ahcun ral kan tei kho lai lo, kan sung lai tinak a si ko.

Pathian fale hna, Pathian bia cu kan ceunak a si. Salm 119:105, ‘na bia cu ka ke caah mei inn a si I, ka lam ah ceunak a si’ tiah a timi bia hi a kan fianhtukmi a si. Pathian bia kan ei lo, kan rel lo ahcun muilak ah kan thlarau cu a tthu ko tinak a si. Muilak thut hnuhnu cu lam a tlau, lam a hngallo, a ping a pang sut lawng a ba tinak a si. Karhlan kan I timh cangka in horkuang ah kan tla lai, kan I chuihpah lai I, kan tlu kan ril lai tinak a si. Kan lam a tluang lai lo I, kan thlarau cu a hrum a ai leen lai tinak a si.

Dawtmi Pathian fale hna, tampi kan chim lai lo. Pathian bia cu pek kan si cang, hunpiak kan si cang, cabuai ah redi in chiahpiak kan si cang. I lak I ei ding cu nangmah le keimah rian bak a si. Kan tha thu hlah seh, tho law ei ve ko cang!

Bawipa nih kan dihlak caah thluachuahnak kan pekpiak ko seh.
Sunparnak cu Bawipa nih co ko seh. Amen!


Bawipa rian ah,

Rev. Thawngling Mualhlun