RUABUK KHUA KUM 100 & KHRIHFA 75 TLIN NAK

Zingpumh thawngtha chimmi(march 1/08)
Pastor Cung Bik
“Jesuh khrih kan ceu nak”(John1:9;8:12)
Tiochun khua kum 100 & khrihfa 75 tlin nak JUBILI ni sunglawi a kan pe i,lam a kan hruaitu,thangtthatnak cantha kan hmuhcaah kan Pathian a minthiangthangtthat si ko seh. Tiochunkhuami ramchung/ramleng um, hringnusorpa nan dahlak cungah Jubili nih a phurh mi a thluahchuah nak a thar in um ko seh.
Tiochun khua cu Pu Chun Kham le a hawi le nih Buangkhua in 1908 kumah an rak tlak. Harsat nakphunkip an tong, saral lakah khua an rak sa. Sihmenhsehlaw hmai lei fanu fapa hna khuasak nak ding an ruah naknih raltthatnak le lung tthawn nak a rak ngeihter hna. An temtuar nak theipar a tlantu kan si. Tu chunni ah um ve hna seh law zei tluk in dah an I nuamh ve lai.
Cun can tlawnpal an van um hnuah Bualpi khua in Pu Rual Tei nih Tiochun khua ah cun Khrihthawngttha cu 1923 hrawngah a rak phuan. Khrihfa si lai cu an rak duh hrimhrim loh. A vokpi tiang zong in meithal in an rakkah piak. Har sat nak tampi a rak tong ve. Sinain khrihthawngttha cu ral ttha te in a dirpi peng. Pathian nih thawn nak a rak pek i khrihfa tthasi nak thinlungput in a dirter. Pathian nih a kan pekmi thlarau nih cun miral chia ah a kan ser lo. Thawnnak le dawtnak le mah le mah i uk khawh nak tu khan a kan khah ter. Cun Pathian nihthazang an pek ningin thawngtthaca i temhnak in kha ngamh lehlam ko (llTimote 1:7). A timi nih thazang thawn nak tampi a rak pek. Pathian bia cu meici bangin a tthang ve ceomao i tu chunni ah cun lunglawmh nak faphalput in kan lawi ve cang. Pathian rianttuan tu ttha tampi kan um ve cang, Fanu fapa ttha tampi hringsor tu ah a cang ve . Cucaah Jesuh khrih thawngtha bia ruangah hin, tu chun kan dirhmun hi kan phan khawh nak zong a si. John thawngttha kan rel mi ah kan hmuh bantuk in Jeuhkhrih cu kan ceu nak taktak cu a si ko. John 8:12 ah`` kei cu hi vulei ceu nak ka si” a ti. Bia cu nun nak hram a si i cu nunnak nih cun minung kha ceu nak a pek hna cu ceunak cu
Muilakah khan a ceu i muihnak nih khan zeitik hmenhah a hmit bal lo (John1:4).
Kan pu pa hna nih khua le ram an tlak ah siseh, khrihthawngttha an rak phuan ah siseh, A mui sehtan pen nak le saral lak ah, ttihnungphun za kip lakah lungtthawng te in tei an rak ma. Cu mui nak chungcun Khrihthawngttha nih cun ceu nak chung ah a luhpi hna. Muihnak nih cun a rak tei kho hrim lo. Cucaah tu chun ni hi bawipa nih a kan pekmi ni sung lawi a si. Hi niahhin i nuam u sih law i lawm u sih. Cu kan i lawmh nak ni cu kan caah Jubili ni cu a si ko.
Bawipa kan Pathian nih Israel mi hna Izipt ram in a chuahpi hna lio ah Moses cu sanai tlang ah a chawnh i Jubili kum he pehtlai in a rak chimh Levitikas25 chungah.
Cun Deuteronomi15:1-6;Exodus21:1-11 ahcun luatnak kum a ti. Hi kum ah cun lei ba zong kha nan I ngaithiam lai a ti.A tawinak in kan chim ahcun luatnak ni philh lo nak, lunglawmh nak puai kan ti ko lai. Lev 25 ahcun Sabbath kum timi pasarih kha nanrel lai, pasarih let sarih kum ahcun a thiangmi muko kha nan chawhpi lai. Rem nakni ahcun nan ramchung vialte ah nan tum thluahmah lai, kum sawmnga nak kum cu nan thian ter lai, ramchung um mi vialte kha luatnak nan thanh hna lai, nan caah Jubili a si lai (v8). Jubili kum ahhin mah le thil sincioah kir than nan si lai. Nan innpa sinah Pakhat le pakhat nan i tleng lai lo. Nan Pathian kha nan ttih lai(v17).Na unau kha a si a fah i nangmah kha an toh ahcun na rak cawm ken lai(v 35). Cun na tangka kha a karh in na cawih hna lai lo, na rawlzong a miak in na pe hna lai lo. Pathian cu ttih ko(v37). Cun Ram nih a theitlai a chuah lai i khimte innan ei lai i ramchungah himte in nan um lai(v19).
Cucaah Jubili kan tuahmi hi a lak a si awk a si lo. Kan bibal caah ttha te in kan hmuh bantuk in kan nun nak zongah nunpi ding kan si. Nuamh sawhsawh le puai menmen lawng in kan hman awk a si lo. Khua chungah hmei nu hmeipa cung ah siseh u le nau cung ah si seh, dawt nak le ngeih thiam nak nun hi kan ngeih zungzal awk a si. Jubili hnu lei ah kan lungthin kan putawk a si mi kan baibal nih a kan cawnpiak mi pa thum in kan van langhter lai:-
1)Dinnak nak kha a catlo mi tivabang in luantercamcin ko uh (Amos5:24). Cun sualnak cu mizeimiphun ca pohah ningzah nak a si, Miphun a lianngan ter tu cu dinnak a si (Phungthlukbia 14:34). A nunning kha a din i a that ah cun a hnu i a tufa cu thluachuah hmu mi an si (phungt 20:7). Cucaah dinnak hi nunpi zuam cio hna u sih.
2).Daihnak kan chiahtak hna vulei nih an pekmi hna deihnak ban tuk a si lo(Jh14:27). A ram cu a daizungzal lai (Isaiah9:7). Bawi Jesuh a chuahka ah vanmi nih hla in an sak mi cu a dawtmi um nak vulei ah rem deih nak leng ko seh an ti (Luka 2:14). Cu bantuk in zumtu tha kan si I jesuh khrihnih a camcilhmi le a thiangthlarau nih lam a hruaimi kan si ah cun kan khua kan ram le kan khrihfa bu ah daih nak a um zungzal awk a si.
3).Dawhnak A hmunzungzalmi thil pathum an um cu hna lakah a ngan bik cu dawt nak a si (I korin 13:13). Cun kei mah nih kan dawthna bantuk tein Pakhat le pakhat i daw uh, nan i dawt i nan zawn nan i ruah ahcun minih a ka zultu nan si kha an in theih hna lai (John13:34). Dawt nak taktak cu thil ti nakah a langmi dawtnakin a si awk a si (IJohn 3:18). Dawtnak hi khrihfa mi kan nunnak ah a herhbik mi a si ti kha mah baibal nih an langhter.
A cunglei ah kan langhter bang in, kan pu pa hna nih khua le ram, khrihfabu an rak dirh tik ah teimaknak thinlung he an rak ttuan. Khrihthawng tha cu ral tthatein an rak dirpi bangin hi pin kan nun lam tluan zong ah Kan pupa hna nung ning le zumhninghi pehzulhin dirpi chin ko hna u sih. Khuami kanza te in Jesuh khrih cu kan ceunak a si zungzal khawh nak hnga dingah cun nifa tin kan nunnak ah dinnak, daihnak le dawtnak hna hi nunpi in thumthlak hri bangin hrual tti zungzal ko hna u sih. Thumthlak hrihrual cu a fek i chah a har mi a si (phungchimtu 4:12). Cu tiin kan nunah cun Khuachungah Rualrem nak a um lai i Pathian thluachuah hmu mi khua kan si lai. (Sam 133). Kan Ram nih theipar ttha a chuahpi lai, canan ram ah a cang lai (levitikas 25:19).
Thawngttha bia ai hrawm tu nan zapi cung ah le Ruabuk khua ciruang kan dih lak caah Pathian nih thluachuah kan pekpiak ko seh.
A men